ស្ថានទូតឥណ្ឌាមិនអស់ចិត្តនឹងការពិនិត្យវីរុសកូវីដ១៩នៅលើសាច់ក្របីនាំចូលពីឥណ្ឌា និង ស្នើឱ្យកម្ពុជាពិនិត្យម្តងទៀត

ភ្នំពេញៈស្ថានទូតឥណ្ឌា ប្រចាំនៅប្រទេសកម្ពុជា មិនអស់ចិត្តចំពោះការរកឃើញវីរុស កូវីដ-១៩ នៅលើសាច់ក្របីដែលនាំចូលពីប្រទេសឥណ្ឌាមកប្រទេសកម្ពុជានិងបានស្នើសុំឲ្យធ្វើតេស្ដម្ដងទៀត។នេះបើតាមប្រភពទំព័រហ្វេសប៊ុកផ្លូវការរបស់អនុគណៈកម្មការស្រាវជ្រាវជំងឺកូវីដ១៩របស់ក្រសួងសុខាភិបាលនៅសៀលថ្ងៃទី២៧ខែកក្កដាឆ្នាំ២០២១។ប្រភពដដែលបន្តថា ស្ថានទូតឥណ្ឌាបានអះអាងថា សាច់ក្របី នេះ ត្រូវបានត្រួតពិនិត្យពីមន្ទីពិសោធន៍ឥណ្ឌា ស្របតាមស្ដង់ដារ ISO ត្រឹមត្រូវមុននឹងនាំចូលមកប្រទេសកម្ពុជា។ មួយវិញទៀតសាច់ក្របីនេះ នាំចេញមកតាមផ្លូវទឹកតាំងពីខែមេសាមកដល់កម្ពុជានៅខែកក្កដា ដែលគ្មានភ័ស្ដុតាងវិទ្យាសាស្ត្រណាបង្ហាញថា វីរុសកូវីដ-១៩ អាចរស់បានលើសម្ភារវេចខ្ចប់អាហារ និងចំណីអាហារ ក្នុងរយៈពេលជិតបីខែនោះទេ។

គួររំលឹកថា សាច់ក្របីក្លាស្សេចំនួនពីរកុងតឺន័រដែលនាំចូលមកពីប្រទេសឥណ្ឌាត្រូវបានគយ និងរដ្ឋាករកម្ពុជា ត្រួតពិនិត្យនិងរកឃើញមានផ្ទុកមេរោគកូវីដ១៩។ចំណែកក្រសួងសុខាភិបាលប្រកាសថា សាច់ក្របីបង្កកពីរកុងតឺន័រ ក្នុងចំណោមប្រាំកុងតឺន័រត្រូវបានរកឃើញមេរោគនេះ។តាមគម្រោងសាច់ក្របីនេះនឹងយកទៅដុតបំផ្លាញចោលនៅក្នុងខេត្តកំពង់ស្ពឺប៉ុន្តែនៅមិនទាន់កំណត់ថ្ងៃជាក់លាក់នៅឡើយទេ។លោក វ៉ី សំណាង អភិបាលខេត្តកំពង់ស្ពឺ បានមានប្រសាសន៍ប្រាប់រស្មីកម្ពុជាឲ្យដឹងនៅថ្ងៃទី២៧ខែកក្កដានេះថា សាច់ក្របីក្លាស្សេចំនួនពីរកុងតឺន័រនឹងត្រូវនាំយកមកដុតបំផ្លាញចោលនៅស្រុកឱរ៉ាល់ខេត្តកំពង់ស្ពឺ។

ប៉ុន្តែនៅមិនទាន់កំណត់ថ្ងៃជាក់លាក់នៅឡើយទេ។លោកបានបញ្ជាក់ថា ចំពោះទីតាំងដែលត្រូវដុតបំផ្លាញសាច់ក្របីចោលនោះ គឺនៅទីតាំងដែលបូជាសពអ្នកដែលស្លាប់ដោយជំងឺកូវីដ-១៩។យោងតាមលិខិតរបស់លោកគុណ ញឹម ប្រតិភូរាជរដ្ឋាភិបាលទទួលបន្ទុកអគ្គនាយកនៃអគ្គនាយកដ្ឋានគយនិងរដ្ឋាកម្ពុជា និងជាប្រធានគណៈកម្មការចំពោះកិច្ច កាលពីថ្ងៃទី២១ ខែកក្កដា ឆ្នាំ២០២១ បានជម្រាបទៅប្រធានក្រុមហ៊ុន អើស្ការី ម៉ិនវសម៉ិន & ខនស្ត្រាក់សិន ឯ.ក ស្តីពីករណីលទ្ធផលវិជ្ជមាននៃវីរុស SARS-Cov-2 លើផលិតផលសាច់ក្របីបង្កកនាំចូលពីប្រទេសឥណ្ឌា ចំនួនពីរកុងតីន័រ ដែលកំពុងស្ថិតនៅទីលានផែស្ងួតត្រីកួដ ដោយផត។

លោកគុណ ញឹម បានជម្រាបទៅប្រធានក្រុមហ៊ុនថា អនុលោមតាមប្រការ២ នៃ ប្រកាសលេខ ៣០៤ សហវ .ប្រក ចុះថ្ងៃទី០៥ ខែឧសភា ឆ្នាំ២០២១ គណៈកម្មការចំពោះកិច្ចមានភារកិច្ចចាត់វិធានការ កម្ទេចចោលសាច់បង្កក និងមុខទំនិញបង្កកផ្សេងទៀតដែលបានរកឃើញថាមានវីរុសកូវីដ-១៩។ក្នុងន័យនេះ ដើម្បីចូលរួមទប់ស្កាត់ការឆ្លងរាលដាលនៃជំងឺកូវិt១៩ និងក្នុងនាមគណៈកម្មការចំពោះកិច្ចខ្ញុំស្មើ លោកប្រធានក្រុមហ៊ុនចូលរួមជាមួយក្រុមការងារចម្រុះ ដើម្បីចាត់វិធានការកម្ទេចចោលសាច់ក្របីបង្កកផ្ទុកក្នុងកុងតឺន័រ ទាំងពីរទូ (MNBU0153955 & MNBU0064694) ដែលបានរកឃើញវិរុសក្ខីវិ៥-១៩ តាមនីតិវិធី។