ខេត្តតាកែវ ៖ ឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានអោយដឹងថ្ងៃទី១៧ ខែសីហា ឆ្នាំ២០២១នេះថា បន្ទាប់ពីបានឃាត់សាកសួរ កម្លាំងជំនាញបានធ្វើការឃាត់ខ្លួនមនុស្សចំនួន០៧នាក់ ស្រី០២នាក់(មេខ្យល់) ដែលជាតំណាងចែកចាយផលិតផលបំប៉នសុខភាពរបស់ក្រុមហ៊ុន យូនីស៊ីធី (UNICITY) មន្ត្រីជំនាញកសាងសំណុំរឿងបញ្ជូនទៅសាលាដំបូងខេត្តតាកែវ ហើយស្វែងរកម្ចាស់ក្រុមហ៊ុនជាបន្ត ។មនុស្សចំនួន០៧នាក់ ស្រី០២នាក់(មេខ្យល់) រួមមាន ៖១-ឈ្មោះ ស៊ី ណាត ភេទប្រុស អាយុ៤១ឆ្នាំរស់នៅភូមិកែវស្នា ឃុំឃ្នេស ស្រុកមេសាង ខេត្តព្រៃវែង ។
២-ឈ្មោះ ស្រេង បានិន ភេទប្រុស អាយុ២៦ឆ្នាំ រស់នៅភូមិតាមឿន ឃុំព្រែកដំបូក ស្រុកស្រីសន្ធរ ខេត្តកំពង់ចាម ។៣-ឈ្មោះ អ៊ុយ សិលា ភេទប្រុស អាយុ៣១ឆ្នាំ រស់នៅភូមិកំពង់បាយ សង្កាត់កំពត ក្រុងកំពត ខេត្តកំពត ។៤-ឈ្មោះ ប៉ិច សាបឿន ភេទស្រី អាយុ៤១ឆ្នាំ រស់នៅភូមិកែស្នា ឃុំឃ្នេស ស្រុកមេសាង ខេត្តព្រៃវែង ។៥-ឈ្មោះ កែវ ឌីណា ភេទប្រុស អាយុ២៧ឆ្នាំ រស់នៅភូមិព្រែកគ្រួស ឃុំសូគង ស្រុកកងមាស ខេត្តកំពង់ចាម ។៦-ឈ្មោះ នូ ចន្ថន ភេទស្រី អាយុ៣៤ឆ្នាំ រស់នៅភូមិព្រែកគ្រួស ឃុំសូគង ស្រុកកងមាស ខេត្តកំពង់ចាម ។
៧-ឈ្មោះ សន ឧត្ដម ភេទប្រុស អាយុ២៥ឆ្នាំ រស់នៅភូមិចំការបី សង្កាត់ដំណាក់ចង្អើរ ក្រុងកែប ខេត្តកែប ។ ដោយមានការជួបជុំរបស់ពួកគេមិនបានសុំការអនុញ្ញាតពីអាជ្ញាធរឡើយ ។ការឃាត់ខ្លួននេះ ក្រោយកម្លាំងសមត្ថកិច្ចធ្វើការត្រួតពិនិត្យឆែកឆេរ រកឃើញប្រជាពលរដ្ឋចំនួន ៣៨៥នាក់ មកពីខេត្តតាកែវ កំពត កែប កណ្តាល និងខេត្តផ្សេងៗទៀត ដោយមានការជួបជុំរបស់ពួកគេមិនបានសុំការអនុញ្ញាតពីអាជ្ញាធរឡើយ ។ ទង្វើនេះវាបានផ្ទុយពីចម្រាមហាមឃាត់របស់រាជរដ្ឋាភិបាល ស្តីពីការទប់ស្កាត់ការឆ្លងរីករាលដាល នៃជំងឺកូវីដ-១៩ ដែលកំពុងដាក់ឱ្យប្រជាពលរដ្ឋនៅគ្រប់រាជធានី-ខេត្តទាំងអស់ នៅក្នុងប្រទេសកម្ពុជាអនុវត្ត ដើម្បីការពារពីជំងឺកូវីដ-១៩នោះ ។
ចំណែកឯ លោក កង អាណាន់ អភិបាលក្រុងដូនកែវ បានអោយកោះសន្តិភាពដឹងថា នៅព្រឹកថ្ងៃទី១៧ ខែសីហានេះ ក្រុមគ្រូពេទ្យបានរកឃើញមាន វិជ្ជមាន កូវីដ-១៩ ចំនួន ២នាក់ហើយ ក្នុងចំណោមមនុស្សប្រុសស្រីទាំង ៣៨៥នាក់ ដែលមកពីខេត្តផ្សេងៗគ្នា និងបានមកប្រមូលផ្តុំគ្នាល្មើស នឹងបម្រាមរបស់រាជរដ្ឋាភិបាល និងបម្រាមរបស់អាជ្ញាធរខេត្ត ដោយក្រុមហ៊ុន Unicity ខាងលើនេះហ៊ានកៀរគរមនុស្ស មកបើកវគ្គសិក្សាលក្ខណៈទ្រង់ទ្រាយធំ ដោយពុំមានច្បាប់អនុញ្ញាតពីជំនាញ ឬអាជ្ញាធរ ព្រមទាំងច្បាប់គ្មានទម្លាប់អ្វីឡើយ ។សូមបញ្ជាក់ថា កាលពីយប់ថ្ងៃអាទិត្យទី១៥ ខែសីហានេះ កំលាំងគណៈបញ្ជាការឯកភាពខេត្តតាកែវបានធ្វើការឡោមព័ទ្ធ និងឃាត់ខ្លួនមនុស្សប្រុសស្រីចំនួន ៣៨៦នាក់ នៅចំណុចបុរីរស្មី សង្កាត់រកាក្នុង ក្រុងដូនកែវ ខេត្តតាកែវ ដែលប្រមូលផ្តុំគ្នាមកសិក្សាវគ្គរៀនសូត្រ ផ្នែកអាហារបំប៉នសុខភាព Unicity។
ដោយឡែក ពាក់ព័ន្ធនឹងក្រុមហ៊ុនយូនីស៊ីធី Unicity នេះដែរលោកឧត្ដមសេនីយ៍ត្រី ញ៉ែម សៅ ស្នងការរងនគរបាលខេត្តកំពង់ស្ពឺ បានសហការជាមួយមន្ត្រីពាក់ព័ន្ធ ឃាត់ខ្លួនជនសង្ស័យ ២នាក់ កសាងសំណុំរឿងបញ្ជូនទៅអយ្យការ ក្រោយម្ចាស់បំណុល និងជនរងគ្រោះសហការប្ដឹងអំពីគំនិតទុច្ចរិតបោកប្រាស់តាមរបៀបចាស់ ។ជនសង្ស័យទាំង ២នាក់ ជាភ្នាក់ងារតំណាងចែកចាយរបស់ក្រុមហ៊ុន យូនីសុធី Unicity ប្រចាំខេត្ដកំពង់ស្ពឺ ដែលមានឈ្មោះ១-ឈ្មោះ វ៉ិត សុខរឺន ភេទប្រុស អាយុ ២៧ ឆ្នាំ មុខរបរ បុគ្គលិកក្រុមហ៊ុន យូនីស៊ីធី មានទីលំនៅភូមិអូរគគី ឃុំតាំងក្រូច ស្រុកសំរោងទង ខេត្ដកំពង់ស្ពឺ ។២-ឈ្មោះ ជា ប៊ីន ភេទប្រុស អាយុ ៤១ ឆ្នាំ មុខរបរ បុគ្គលិកក្រុមហ៊ុន យូនីស៊ីធី មានទីលំនៅ ភូមិក្រាំងពង្រ ឃុំខ្ទុំក្រាំង ស្រុកសំរោងទង ខេត្ដកំពង់ស្ពឺ ។
កាលពីពេលកន្លងទៅថ្មីៗនេះ ជនទាំងពីរនាក់ខាងលើ បានអះអាងថា គាត់ជាបុគ្គលិកក្រុមហ៊ុន Unicity លក់ឱសថអាហារបំប៉នសុខភាព ដែលមានគុណភាព និងការទទួលបានភាពជឿជាក់ពីមនុស្សរាប់លាននាក់ នៅក្នុងព្រះរាជាណាចក្រកម្ពុជា ពិសេសបណ្ដាប្រទេសមួយចំនួននៅលើពិភពលោក ដោយការផ្ដល់ជូននៅការណែនាំប្រឹក្សាយោបល់ពីសំណាក់អ្នកជំនាញ(វេជ្ជសាស្ដ្រ)មកពីបរទេស និងមានវេជ្ជបណ្ឌិតល្បីៗ ដែលបានបញ្ចប់ថ្នាក់បណ្ឌិតលើផ្នែកសុខភាពរាង្គកាយមនុស្ស ព្យាបាលជំងឺ ដោយប្រើឱសថអាហារបំប៉នសុខភាពញាំចូលទៅខាងក្នុងព្យាបាលជួសជុលសិរីរាង្គផ្នែកខាងក្នុងប្រកបដោយភាពជោគជ័យ១០០% ដោយមិនចាំបាច់ការព្យាបាលជំងឺដោយការចាក់ថ្នាំ ព្យួរសេរ៉ូម។បន្ថែមពីនោះពួកគេបានបញ្ចុះបញ្ចូលឱ្យអតិថិជនរបស់ពួកគេយល់ និងទទួលយកនូវគំនិតវិភាគ នៃអាការជំងឺជឿជាក់ឥតកែប្រែដោយការធានា និងលើកយកឧទាហរណ៍ជាក់ស្ដែង ពីមនុស្សណាម្នាក់ ដែលធ្លាប់ឈឺរាប់ខែឆ្នាំហើយបានធូរស្បើយ បន្ទាប់ពីបានប្រើប្រាស់នូវឱសថអាហារបំប៉នសុខភាពរបស់ក្រុមហ៊ុនគេមួយរយៈពេលខ្លី ដើម្បីយកមកធ្វើជាទេវតាប្រែធាតុ បន្លំភ្នែក ផ្ដល់ក្ដីសង្ឃឹមសម្រាប់អតិថិជនថ្មី របស់ពួកគេបន្ដបន្ទាប់ទៀត ។
បន្ទាប់ពីការជឿជាក់ មកពួកគេបានព្យាយាមអូសទាញ អោយអតិថិជនប្រើប្រាស់ផលិតផល ដោយបានប្រាក់ចំណេញមកវិញ និងមានឱកាសរកប្រាក់ចំណូល បានមកពីការឃោសនាលក់ផលិតផលរបស់ក្រុមហ៊ុនគេបន្ដ ផ្លាស់ប្ដូរឋានៈពីអ្នកប្រើប្រាស់ធម្មតាទៅជាភ្នាក់ងារចែកចាយកម្រិតបឋម និងអ្នកខ្លះក្លាយជា ប្រធានផ្នែកគ្រប់គ្រងតំបន់ក៏មាន ដោយការយកប្រាក់សុទ្ធមកធ្វើការទិញកញ្ចប់វិនិយោគជាមួយក្រុមហ៊ុន ។ជាក់ស្ដែងម្ចាស់បំណុលជាជនរងគ្រោះ ត្រូវបានតំណាងភ្នាក់ងារក្រុមហ៊ុន រួមជាមួយបក្ខពួក ៤នាក់ផ្សេងទៀត ណែនាំឱ្យទិញកញ្ចប់តម្លៃ ២៥,០០០ដុល្លាអាមេរិក ដោយសន្យាផ្ដល់ភាគលាភ ក្នុងមួយខែ ចំនួន ៣,០០០ដុល្លាអាមេរិក និងទទួលបានកាតមាស ពីក្រុមហ៊ុនសម្រាប់ការបំពេញការងារនឹងទៅថៃ្ងអនាគត ចូលនិវត្ដន៍ ទទួលបានប្រាក់ឧបត្ថម្ភប្រចាំខែពី ១,៥០០ដុល្លារអាមេរិក ទៅ ៣,៥០០ដុល្លារអាមេរិក មានឱកាសទៅបរទេសដើរលេងតាមទ្វីបអរ៉ុប និងអាស៊ី ។ល។
ក្រោយពីការពន្យល់រួច ម្ចាស់បំណុលជាជនរងគ្រោះ បានយល់ព្រម ប៉ុន្ដែមិនមានប្រាក់គ្រប់ចំនួន ពួកគេបានបង្គាប់ឱ្យជនរងគ្រោះយកទ្រព្យផ្ទាល់ខ្លួនទៅដាក់បញ្ចាំយកប្រាក់ ដោយបានណែនាំទីផ្សាទទួលបញ្ចាំឯកជន ងាយឆាប់រហ័ស មិនចាំបាច់រត់ការស្មុគស្មាញយូរឡើយ និងបានធានាថា ក្នុងករណីខែដំបូងក្រុមហ៊ុនជួយចេញថ្លៃការប្រាក់ចំនួន ០២ខែ ។ក្រោយពីទទួលបានប្រាក់ដល់ដៃពួកគេហើយ គឺគេចខ្លួនជារៀងរហូត មិនមានអ្វីដូចការសន្យាគ្រាដំបូង គឺចេះតែសន្យារកលេសនេះលេសនោះថា ក្រុមហ៊ុនកំពុងតែចាត់ចែងនាំអតិថិជនទៅក្រៅប្រទេស និងកំពុងនាំផលិតផលថ្មីចូលមកទៀត «កុំភ័យថវិកាមិនបាត់បង់ទេ» ។សមត្ថកិច្ចជំនាញ ស្នើសុំឲ្យពលរដ្ឋខ្មែរ ដែលចូលជាតំណាងចែកចាយផលិតផលបំប៉នសុខភាពរបស់ក្រុមហ៊ុន សូមមេត្ដាបញ្ឈប់ជាបន្ទាន់ កុំឲ្យលង់ចាញ់កលល្បិចក្រុមនេះបន្ដ និងសមត្ថកិច្ចបញ្ជាក់ថា បើមានរឿងរ៉ាវដូចក្នុងករណីខាងលើ សូមមកដាក់ពាក្យបណ្ដឹង ដើម្បីសមត្ថកិច្ចជួយរកយុត្ដិធម៌ជូន ៕
No comments:
Post a Comment