www.sundaytvonline.com /ទំនាក់ទំនងព័ត៌មាន និងផ្សព្វផ្សាយពាណិជ្ជកម្ម Tel: 060842222 / 093843333 /រក្សាសិទ្ធគ្រប់យ៉ាង ដោយអង្គភាពគេហទំព័រសាន់ដេ


ប្រជាពលរដ្ឋជាង២០០គ្រួសារ សុំអន្តរាគមន៍ពីសម្តេចតេជោ ហ៊ុន សែន ក្រោយចំណាយលុយរាប់ម៉ឺនដុល្លារទិញផ្ទះនៅបុរី VIP ក្នុងខណ្ឌដង្កោ តែមិនទាន់ទទួលបានផ្ទះ និងប្លង់

(ភ្នំពេញ)៖ ប្រជាពលរដ្ឋប្រមាណ២៤៨គ្រួសារ ដែលជាអតិថិជនទិញផ្ទះនៅបុរី VIP ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ នៅថ្ងៃទី១០ ខែមករា ឆ្នាំ២០២២នេះ បានស្វែងរកអន្តរាគមន៍ពីសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ក្រោយពួកគេបានចំណាយលុយរាប់ពាន់ដុល្លារ រាប់ម៉ឺនដុល្លារ ដោយខ្លះត្រូវបង់រំលស់ប្រចាំខែ និងខ្លះទៀតបានបង់ផ្តាច់ តែរហូតមកដល់ពេលនេះ មិនទាន់បានទទួលផ្ទះនៅឡើយទេ ពោលបានហួសកិច្ចសន្យា ២ ទៅ៣ឆ្នាំ មកហើយ។ការស្វែងអន្តរាគមន៍ពីប្រមុខរាជរដ្ឋាភិបាលកម្ពុជាខាងលើនេះ បានធ្វើឡើងក្រោយពីការស្វែងរកដំណោះស្រាយពីអាជ្ញាធរខណ្ឌដង្កោ មិនទាន់ទទួលជោគជ័យ បើទោះបីមានការជួបប្រជុំគ្នារវាងប្រជាពលរដ្ឋ ម្ចាស់បុរី ក្រោមការសម្របសម្រួលពីអាជ្ញាធរក៏ដោយនោះ។

ជាក់ស្តែងនៅព្រឹកថ្ងៃទី១០ ខែមករា ឆ្នាំ២០២២នេះ តំណាងប្រជាពលរដ្ឋទាំង២៤៨គ្រួសារ បានធ្វើដំណើរយកញត្តិទៅដាក់នៅខុទ្ទកាល័យសម្តេចតេជោនាយករដ្ឋមន្រ្តី ដើម្បីឲ្យសម្តេចជួយដោះស្រាយ ទៅកាន់ម្ចាស់បុរី ខណៈដែលពួកគេបានខិតខំរកលុយទៅបង់ថ្លៃផ្ទះប្រចាំខែ ប៉ុន្តែលទ្ធផលមិនទាន់ទទួលបានផ្ទះនៅឡើយរហូតមកដល់ពេលនេះ ស្របពេលដែលស្ថានភាពជំងឺកូវីដបានវាយប្រហារជីវភាពរបស់ពួកគាត់ផងនោះ។យោងតាមពាក្យបណ្តឹងរបស់ប្រជាពលរដ្ឋ បានស្នើសុំសម្តេចតេជោនាយករដ្ឋមន្រ្តីឲ្យជួយអន្តរាគមន៍ដល់លោក ហម រ៉ន និងលោក វន វណ្ណៈ ដែលជាអគ្គនាយក ក្រុមហ៊ុន អ.អ៊ិន វីអាយភី រៀល អឺស្តេត ឯ.ក និង បុរី VIP ស្ថិតនៅភូមិម៉ឺនត្រា សង្កាត់ស្ពានថ្ម ខណ្ឌដង្កោ រាជធានីភ្នំពេញ ឱ្យដោះស្រាយបញ្ហាជូនពួកគាត់។

តាមពាក្យបណ្តឹងតំណាងប្រជាពលរដ្ឋបានរៀរាប់បញ្ហាដូចខាងក្រោម៖។*ទី១៖ ប្រជាពលដ្ឋរងគ្រោះបង់ប្រាក់ផ្តាច់មិនទាន់បានផ្ទះចំនួន ២៨គ្រួសារ ត្រូវសង់ផ្ទះឱ្យរួច និងត្រូវកាត់ប្លង់កម្មសិទ្ធិជូនពួកគាត់។*ទី២៖ ប្រជាពលដ្ឋរងគ្រោះបង់ប្រាក់ផ្តាច់ បានផ្ទះហើយ តែមិនទាន់បានប្លង់ចំនួន ៨០គ្រួសារ ត្រូវធ្វើប្លង់កម្មសិទ្ធិជូនពួកគាត់។*ទី៣៖ ប្រជាពលរងគ្រោះបង់ប្រាក់មិនទាន់ផ្តាច់ ផ្ទះមិនទាន់សង់ហើយ (កិច្ចសន្យា) ចំនួន៨៨គ្រួសារ ត្រូវសាងសង់ផ្ទះឱ្យហើយ និងធ្វើប្លង់បំបែកក្បាលដីជូនពួកគាត់ ដើម្បីសិក្សាជាមួយធនាគារ ដើម្បីយកប្រាក់បង់ផ្តាច់ជូនបុរី។

*ទី៤៖ ប្រជាពលរដ្ឋរងគ្រោះបង់ប្រាក់មិនទាន់ផ្តាច់ បានផ្ទះហើយ តែមិនទាន់បានប្លង់បំបែកក្បាលដី ចំនួន ៥២គ្រួសារ ត្រូវធ្វើប្លង់បំបែកក្បាលដីជូនពួកគាត់ ដើម្បីសិក្សាជាមួយធនាគារ ដើម្បីយកប្រាក់បង់ផ្តាច់ជូនបុរី។បើតាមប្រជាពលរដ្ឋ ខាងបុរីធ្វើឲ្យហួសកិច្ចសន្យា ២ ទៅ ៣ឆ្នាំហើយ ចំណែកសាលាខណ្ឌដង្កោបានអញ្ជើញលោក ហម រ៉ន និងលោក វន វណ្ណៈ ដែលជាអគ្គនាយកបុរី និងតំណាងជនរងគ្រោះមកប្រជុំដោះស្រាយចំនួន២ដងដែរ កាលពីថ្ងៃទី៥ និងថ្ងៃទី២៩ ខែវិច្ឆិកា ឆ្នាំ២០២១ ដោយខាងបុរីសន្យាថានឹងដាក់ជាងចូលសាងសង់ផ្ទះនៅពាក់កណ្តាលខែធ្នូ ឆ្នាំ២០២១ តែរហូតមកដល់ថ្ងៃនេះបុរីនៅតែមិនព្រមគោរពតាមកិច្ចសន្យាដដែល។

តំណាងប្រជាពលរដ្ឋ បានប្រាប់បណ្តាញព័ត៌មាន Fresh News នៅរសៀលថ្ងៃនេះ ផ្ទះនៅបុរី VIP មានតម្លៃចាប់ពីជាង២ម៉ឺនដុល្លារ ដល់ជាង១០ម៉ឺនដុល្លារ ហើយប្រជាពលរដ្ឋខ្លះបានបង់ប្រចាំខែចាប់ពី៣០០ដុល្លារឡើងទៅ ពោលម្នាក់ៗបានចំណាយរាប់ពាន់ រាប់ម៉ឺនដុល្លារទៅហើយ តែមិនទាន់ទទួលបានផ្ទះ និងប្លង់នៅឡើយទេ។បើតាមតំណាងប្រជាពលរដ្ឋ ពួកគាត់បានទិញផ្ទះពីបុរី VIP តាំងពីឆ្នាំ២០១៨ រហូតមកដល់បច្ចុប្បន្ននេះខាងបុរីធ្វើផ្ទះមិនទាន់ហើយតាមការកំណត់ និងខ្លះហើយតែមិនទាន់បានប្លង់កម្មសិទ្ធិ ដូច្នេះហើយទើបពួកគាត់ស្នើសុំ សម្តេចតេជោ ហ៊ុន សែន មេត្តាសុំជួយអន្តរាគមន៍ដល់ លោក ហម រ៉ន និងលោក វន វណ្ណៈ ជួយសាងសង់ផ្ទះ និងប្រគល់ប្លង់កម្មសិទ្ធិមកឱ្យពួកគាត់វិញផង៕




Post a Comment

0 Comments