ពិធីសំណេះសំណាល និងបំពាក់គ្រឿងឥស្សរិយយសជូនអតីតយុទ្ធជនកម្ពុជាខេត្តកំពង់ចាម ចំនួន២០០នាក់

កំពង់ចាម៖នៅព្រឹកថ្ងៃអង្គារ ទី០៩ ខែឧសភា ឆ្នាំ២០២៣នេះ លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្ត និងជាប្រធានគណៈកម្មាធិការសមាគមអតីតយុទ្ធជនខេត្តកំពង់ចាម បានអញ្ជេីញចូលរួមក្នុងពិធីសំណេះសំណាល និងបំពាក់គ្រឿងឥស្សរិយយសជូនអតីតយុទ្ធជនកម្ពុជាខេត្តកំពង់ចាម ចំនួន២០០នាក់ ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា និងមានអញ្ជេីញចូលរួមជាគណៈអធិបតីពី ឯកឧត្តម អ៊ុន ចាន់ដា អភិបាល នៃគណៈអភិបាលខេត្ត និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពងលចាម និងឯកឧត្តម ខ្លូត ផន ប្រធានក្រុមប្រឹក្សាខេត្តកំពង់ចាម ។

គ្រឿងឥស្សរិយយសដែលទទួលបានមាន មេដាយអស្សឬទ្ធិចំនួន០៤នាក់ មេដាយមាសការពារជាតិ៩៨នាក់ និងមេដាយប្រាក់ការពារជាតិ៩៨នាក់ បានបំពាក់ជូនអតីតយុទ្ធជនមកពីក្រុងកំពង់ចាមចំនួន១៨០នាក់ និងស្រុកកំពង់សៀមចំនួន៨០នាក់ ។ ក្នុងឱកាសនេះដែរ ឯកឧត្តម កិត្តិសង្គហបណ្ឌិត ក៏បាននាំយកអំណោយដ៏ថ្លៃថ្លារបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា ចែកជូនបងប្អូនអតីតយុទ្ធជូនចំនួន២០០នាក់ ក្នុងម្នាក់ៗទទួលបាន ថវិកា ៨មុឺនរៀល ផងដែរ។

លោកឧត្តមសេនីយ៍ត្រី ហេង វុទ្ធី ប្រធានគណៈកម្មាធិការសមាគមអតីតយុទ្ធជនកម្ពុជាខេត្តកំពង់ចាម បានគោរពរាយការណ៍ជូនគណៈអធិបតី អំពីលទ្ធផលការងារដែលសម្រេចបានរយៈពេលកន្លងមក និងទទួលបានការកោតតសរសេីរពី ឯកឧត្តម កិត្តិសង្គហបណ្ឌិត គន់ គីន ក្នុងការខិតខំយកចិត្តទុកដាក់ និងយកអស់កំលាំងកាយចិត្តក្នុងការបម្រេីសេវាសំណូមពរពីបងប្អូនអតីតយុទ្ធជន លេីការពិនិត្យស្ថានភាពជីវភាពរស់នៅជាក់ស្ដែងរបស់បងប្អូន រហូតទទួលបានការផ្ទះដីសម្បទានសង្គមកិច្ច និងការសាងសង់ផ្ទះ ព្រមទាំងការលេីកកម្ពស់កម្រិតជីវភាពរបស់បងប្អូនអតីតយុទ្ធជន បានល្អប្រសេីមកដល់បច្ចុប្បន្ននេះ ទាំងអស់នេះគឺជាអំណោយដ៏ថ្លៃថ្លារបស់ សម្ដេចតេជោ នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា។

សូមបញ្ជាក់ផងដែរថា ដោយទទួលបានការគិតគូរយកចិត្តទុកដាក់ដ៏ខ្ពង់ខ្ពស់បំផុតពីសំណាក់ប្រមុខថ្នាក់ដឹកនាំ ដេីម្បីជាការឆ្លេីយតបទៅនឹងពលីកម្មដ៏ស្មោះសគ្រ័្មរបស់បងប្អូនអតីតយុទ្ធជនកម្ពុជា ដែលត្រូវបានចាត់ទុកថាជាគំរូវីរភាពស្នេហាជាតិដ៏ឧត្តុងឧត្តម និងគុណបំណាច់ដ៏ធំធេងចំពោះជាតិមាតុភូមិ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា បានក្រាបបង្គំទូលថ្វាយ ព្រះមហាក្សត្រ ប្រោសព្រះរាជទាននូវគ្រឿងឥស្សរិយយសដល់បងប្អូនអតីតយុទ្ធជនកម្ពុជា ចំនួន៨៦,៩៣១នាក់ នៅទូទាំងប្រទេស ។ ក្នុងនោះសម្រាប់ខេត្តកំពង់ចាម ទទួលបានមេដាយសរុបចំនួន៣,១៤៩នាក់ ។

ក្នុងពិធីនេះក៏មានការអញ្ជេីញចូលរួមពីសំណាក់ ឯកឧត្តម ប្រតិភូអមដំណើរ លោកប្រធាន អនុប្រធាន គណៈកម្មាធិការសមាគមអតីតយុទ្ធជនកម្ពុជាខេត្តកំពង់ចាម លោកប្រធានកិត្តិយសសមាគមអតីតយុទ្ធជនក្រុង-ស្រុក លោកប្រធានលេខាធិការដ្ឋាន លោកស្នងការរងទទួលចុះពង្រឹងស្រុក-ក្រុង លោកប្រធានគណៈកម្មាធិការសមាគមអតីតយុទ្ធជនស្រុក-ក្រុង ទាំង១០ និងបងប្អូនអតីតយុទ្ធជនចំនួន២០០នាក់ ៕