សមត្ថកិច្ច ដោះលែងម្ចាស់ផ្ទះ ដែលសង្ស័យជាប់ពាក់ព័ន្ធរថយន្ត ខ្មាន់កាំភ្លើង បាញ់សម្លាប់ នាយរងព្រហ្មទណ្ឌកម្រិតស្រាល

ភ្នំពេញ៖នៅព្រឹកថ្ងៃទី៣០ ខែធ្នូ ឆ្នាំ២០២០ នេះ សមត្ថកិច្ច បានរកឃើញឡាន Lexus RX300 ពណ៌ខ្មៅ ពាក់ផ្លាកលេខ សៀមរាប 2A-4546 តែត្រូវបានដក ផ្លាកលេខចេញ នៅចំណុចសង្កាត់ពញាពន់ ខណ្ឌព្រែកព្នៅ ។ ក្រោយការរកឃើញនេះ សមត្ថកិច្ចបានហៅម្ចាស់ផ្ទះ សួរនាំ ដើម្បីរកតម្រុយឃាតករ ដែលបានបាញ់សម្លាប់ លោក រ៉េត ស៊ីណែត នាយរងព្រហ្មទណ្ឌកម្រិតស្រាល ។ នៅរសៀលថ្ងៃដដែលនេះ សមត្ថកិច្ច ក៏បានដោះលែងម្ចាស់ផ្ទះ ក្រោយពីសាកសួរ ពុំមានជាប់ពាក់ព័ន្ធនឹងករណីនេះ។លោកឧត្តមសេនីយ៍ទោ ជាវ វិបុល អនុប្រធាននាយកដ្ឋាន នគរបាលព្រហ្មទណ្ឌ នៃក្រសួងមហាផ្ទៃ បានបញ្ជាក់ថាៈ ម្ចាស់ផ្ទះនេះ មិនពាក់ព័ន្ធទេ គឺ សមត្ថកិច្ចអនុញ្ញាត អោយត្រឡប់ទៅវិញហើយ នៅរសៀលថ្ងៃ ដដែលនេះ ។

គួររំលឹកថា យោងតាមរបាយការណ៍របស់ លោកវរសេនីយ៍ត្រី ជ្រេង ធី នាយប៉ុស្តិ៍នគរបាល រដ្ឋបាលកាកាបទី២ បានអោយដឹងថាៈ លោកវរសេនីយ៍ទោ រ៉េត ស៊ីណែត នាយរងការិយាល័យ ព្រហ្មទណ្ឌកម្រិតស្រាល នៃស្នងការដ្ឋាននគរបាល រាជធានីភ្នំពេញ បានបើករថយន្តបាំងពីមុខរថយន្តជនបង្ក រួចដកកាំភ្លើងខ្លី ម៉ាក Glock ភ្ជង់ទៅលើរថយន្តភាគីម្ខាងទៀត ក្នុងគោលបំណង មិនអោយបើកគេចខ្លួន ក្រោយបង្កគ្រោះថ្នាក់ចរាចរណ៍បន្តិចបន្តួច ។ ក្រោយមក ភាគីជនបង្ក បានបាញ់ប្រហារ ជាច្រើនគ្រាប់ ធ្វើអោយលោក រ៉េត ស៊ីណែត ស្លាប់ នៅកន្លែងកើតហេតុ តែម្តង ហើយក្រុមជនបង្ក បានបើកឡានគេចខ្លួន ។ អំពើបាញ់ប្រហារនេះ បានកើតឡើង កាលពីវេលាម៉ោង ១២ និង ០៥ នាទី រំលងអធ្រាត្រ ឈានចូលថ្ងៃទី៣០ ខែធ្នូ ឆ្នាំ២០២០ នៅចំណុចមហាវិថី សហព័ទ្ធរុស្ស៊ី ភូមិក្បាលដំរី២ សង្កាត់កាកាបទី២ ខណ្ឌពោធិ៍សែនជ័យ ។របាយការណ៍ ដដែលបន្តថា ជនសង្ស័យចំនួន២នាក់ មិនស្គាល់អត្តសញ្ញាណ បើករថយន្តមួយគ្រឿងម៉ាក Lexus RX300 ពណ៌ខ្មៅ ពាក់ផ្លាកលេខ សៀមរាប 2A-4546 ។ ចំណែកជនរងគ្រោះ ជិះរថយន្តម៉ាក Ford Raptor F150 ពណ៌ស ស៊េរីឆ្នាំ២០២០ ពាក់ផ្លាកលេខភ្នំពេញ 2BD-3738 ។

ដំណើរឿងមួយនេះ ត្រូវបានរៀបរាប់ ក្នុងរបាយការណ៍ថាៈ ជនរងគ្រោះ និងឈ្មោះ ង៉ាន់ ភីលីន បានចេញពីហាងស៊ុប នៅម្តុំវត្តភ្នំ ហើយជនរងគ្រោះ បើករថយន្តលើមហាវិថី សហព័ទ្ធរុស្ស៊ី ពីខាងកើត មកខាងលិច ។ ពេលមកដល់ចំណុចកើតហេតុ ក៏មានរថយន្ត ម៉ាក Lexus RX300 ពណ៌ខ្មៅ ពាក់ផ្លាកលេខ សៀមរាប 2A-4546 ដោយនៅក្នុងរថយន្ត មានគ្នាចំនួន ៥នាក់ (ប្រុស២នាក់ ស្រី២នាក់ និង ក្មេងតូចម្នាក់) បានបុកពីក្រោយរថយន្ត Ford របស់ជនរងគ្រោះ ផ្នែកខាងឆ្វេង បណ្តាលអោយខូចខាត ។ ចំណែករថយន្ត Lexus RX300 ខូចខាតខាងស្តាំ ផ្នែកខាងមុខ ។ ពេលនោះ ជនរងគ្រោះ រ៉េត ស៊ីណែត បានបើករថយន្តបាំង ពីមុខរថយន្ត Lexus RX300 រួចដកកាំភ្លើងខ្លីម៉ាក Glock ភ្ជង់ទៅលើរថយន្ត Lexus RX300 ក្នុងគោលបំណង មិនអោយបើកគេចខ្លួន ។បន្ទាប់មក ជនបង្កទាំង២នាក់ ក៏បានចុះមកចរចារជាមួយជនរងគ្រោះ ដោយព្រមព្រៀងយករថយន្ត Ford ទៅជួសជុសនៅម្តុំក្រោយពេទ្យលោកសង្ឃ ហើយក៏បានបើករថយន្តមកអែបខាងទាំងអស់គ្នា ។ ពេលនោះ មនុស្សស្រី២នាក់ និង ក្មេងតូចម្នាក់ បានជិះ Pass App ចេញពីកន្លែងកើតហេតុទៅមុន ។

ចំណែកជនរងគ្រោះ និង ឈ្មោះ ង៉ាន់ ភីលីន អង្គុយមើលរថយន្ត Ford ដែលខូចខាត ក៏ស្រាប់តែជនល្មើស ២ នាក់ ដែលជាជនបង្កគ្រោះថ្នាក់ចរាចរណ៍ បានដកកាំភ្លើងខ្លី មិនស្គាល់ម៉ាក ពណ៌ទឹកប្រាក់ បាញ់សំដៅជនរងគ្រោះ ពីក្រោយ បណ្តាលអោយស្លាប់ នៅកន្លែងកើតហេតុ ។ចំណែកជនល្មើស ២នាក់ បានបើកឡាន Lexus RX300 ឆ្ពោះទៅទិសខាងលិច តាមមហាវិថីសហព័ទ្ធរុស្ស៊ី គេចខ្លួន ហើយឈ្មោះ ង៉ាន់ ភីលីន បានស្ទុះមកមើល ជនរងគ្រោះ ហើយដកកាំភ្លើងរបស់ ជនរងគ្រោះ ពីក្នុងហោប៉ាវខាងស្តាំ បាញ់ចំនួន ៣ គ្រាប់ ឡើងទៅលើ ។

ជុំវិញបញ្ហានេះ ការិយល័យបច្ចេកទេស វិទ្យាសាស្ត្រ និង ឧកញ៉ាវេជ្ជបណ្ឌិត នង សុវណ្ណរ័ត្ន គ្រូពេទ្យរាជធានីភ្នំពេញ បានធ្វើកោលស្យវិច័យ ដោយបញ្ជាក់ថា «ជនរងគ្រោះស្លាប់ ដោយអំពើឃាតកម្ម បាញ់សម្លាប់ បង្កដោយសារគ្រោះថ្នាក់ចរាចរណ៍ ។ជាមួយគ្នានេះ នារសៀលថ្ងៃទី៣០ ខែធ្នូ ឆ្នាំ២០២០ សមត្ថកិច្ច ក៏បានរកឃើញ ឡាន Lexus RX300 ដែលជារបស់ជនល្មើស ផងដែរ នៅខណ្ឌព្រែកព្នៅ តែមិនទាន់ចាប់ខ្លួនជនល្មើស បាននៅឡើយទេ ៕/V

សមត្ថកិច្ច ដោះលែងម្ចាស់ផ្ទះ ដែលសង្ស័យជាប់ពាក់ព័ន្ធរថយន្ត ខ្មាន់កាំភ្លើង បាញ់សម្លាប់ នាយរងព្រហ្មទណ្ឌកម្រិតស្រាល សមត្ថកិច្ច ដោះលែងម្ចាស់ផ្ទះ ដែលសង្ស័យជាប់ពាក់ព័ន្ធរថយន្ត ខ្មាន់កាំភ្លើង បាញ់សម្លាប់ នាយរងព្រហ្មទណ្ឌកម្រិតស្រាល