ភ្នំពេញ៖ជនសង្ស័យជាឃាតក បាញ់សម្លាប់នាយរងនគរបាលព្រហ្មទណ្ឌកម្រិតស្រាលធានីភ្នំពេញ ដែលសមត្ថកិច្ចកំពុងតាមប្រមាញ់ចាប់នៅខេត្តស្ទឹងត្រែង និងខេត្តរតនគិរី តាមពិតគឺជាបុគ្គលម្នាក់ដ៏សាហាវបំផុត ធ្លាប់ប្រព្រឹត្តបទឧក្រិដ្ឋ កន្លងទៅ និងធ្លាប់ជាប់ពន្ធនាគារ ទើបជនសង្ស័យរូបនេះ មិនចោលសារជាតិរបស់ខ្លួន បន្តប្រព្រឹត្តបទឧក្រិដ្ឋដដែល។ សូមរំលឹកថា, ជនសង្ស័យជាឃាតកររូបនេះមានឈ្មោះ អ៊ា ណារ៉េន ហៅ រិន ផាន់ អាយុ ៣៨ ឆ្នាំ អតីតទាហានកម្ម៉ង់ដូ ស្នាក់នៅផ្ទះលេខ ៥៨ អ៉ឺ១ ផ្លូវ ១១០ ភូមិ ១៦ សង្កាត់ផ្សារកណ្ដាល ១ ខណ្ឌ ដូនពេញ ។
នៅដេីមឆ្នាំ ២០០៣ ឈ្មោះ អ៊ា ណារ៉េន និង បក្សពួក ធ្លាប់ធ្វើសកម្មភាពប្លន់បាញ់សម្លាប់ លោក ឱម រដរដ្ឋសាឌី ទីប្រឹក្សាសម្ដេចក្រុមព្រះ ប្លន់យកទូរស័ព្ទដៃ ណូគា ៩២០០ នៅចំណុចជិតផ្សារកាប់គោ សង្កាត់ ទន្លេបាសាក់ ខណខណ្ឌចំការមន។ ក្រោយធ្វើសកម្មភាពប្លន់បាញ់សម្លាប់លោក ឱម រដ្ឋសាឌី កម្លាំងជំនាញ ការិយាល័យប្រឆាំងភេរវកម្ម នៃស្នងការដ្ឋាននគរបាលរាជធានី បានស្រាវជ្រាវចាប់ឃាត់ខ្លួន អ៊ា ណារ៉េន និង បក្សពួក ឈ្មោះផាត បញ្ជូនទៅ តុលាការរាជធានីភ្នំពេញ ។
តុលាការរាជធានីបានផ្ដន្ទាទោសដាក់ពន្ធនាគារ ។ នៅឆ្នាំ ២០១៨ ឈ្មោះ អ៊ា ណារ៉េន បានចេញពីពន្ធនាគារ ។ នៅយប់ថ្ងៃទី ៣០ ខែ ធ្នូ ឆ្នាំ ២០២០ ឈ្មោះ អ៊ា ណារ៉េន បានបាញ់សម្លាប់នាយរងការិយាល័យនគរបាលព្រហ្មទណ្ឌកំរិតស្រាល នៃស្នងការដ្ឋាននគរបាលរាជធានីភ្នំពេញ ក្នុងហេតុការណ៍គ្រោះថ្នាក់ចរាចរណ៍នៅមុខ ព្រលានយន្តហោះអន្តរជាតិភ្នំពេញ ។
ប្រភពមួយបានបញ្ជាក់ថា មូលហេតុដែល អ៊ា ណារ៉េន បាញ់សម្លាប់ នាយរងការិយាល័យនគរបាលព្រហ្មទណ្ឌកំរិតស្រាល ព្រោះតែពេលមានគ្រោះថ្នាក់ចរាចរណ៍ ជនរងគ្រោះ បានជេរប្រមាថដោយពាក្យអសុរោះជាច្រើនទៅលេី អ្នកបេីកបរ រថយន្ដ Rx300 ដែលធ្វើឲ្យ អ៊ា ណារ៉េន ខឹងក៏បាញ់សម្លាប់តែម្ដង ។ ( ករណីអ្នកលេង ប៉ះអ្នកមែន ហេីយអ្នកមែនជាមុខសញ្ញាចាស់ថែមទៀត )។
បច្ចុប្បន្នជនសង្ស័យខាងលើ កំពុងលាក់ខ្លួនក្នុងព្រៃគេចពីការប្រមាញ់ឡោមព័ទ្ធរបស់សមត្ថកិច្ច ហើយក៏ត្រូវប្រយ័ត្នផងដែរ ចំពោះប្រតិបត្តិការចុះបង្ក្រាប ខណៈជននេះមានកាំភ្លើងនៅជាប់តាមខ្លួន អាចនឹងបាញ់តដៃណាមួយជាមួយសមត្ថកិច្ច។ ទោះជាយ៉ាងណាក៏ដោយសមត្ថកិច្ច បានសហការគ្នាចម្រុះស្ថាប័ន បំពេញការងារដោយការប្រុងប្រយ័ត្ន គ្រប់វិធីសាស្រ្តដើម្បីចាប់ឃាត់ជនសង្ស័យខាងលើនេះ យកមកធ្វើការផ្ដន្ទាទោសទៅតាមផ្លូវច្បាប់៕
No comments:
Post a Comment