មីយ៉ាន់ម៉ា៖មេដឹកនាំមីយ៉ាន់ម៉ា លោកស្រី អ៊ុង សាន ស៊ូជី និងឥស្សរជនជាន់ខ្ពស់ក្នុងគណបក្សកាន់អំណាចដទៃទៀត ត្រូវបានចាប់ខ្លួននៅក្នុងការឆ្មក់ចូលចាប់នៅដើមថ្ងៃចន្ទទី០១កុម្ភៈ នេះបើតាមអ្នកនាំពាក្យគណបក្សសម្ពន្ធជាតិសំរាប់លទ្ធិប្រជាធិបតេយ្យដែលកំពុងកាន់អំណាច។ចំណាត់ការនេះបានកើតឡើងក្រោយមានភាពតានតឹងអស់ពេលជាច្រើនថ្ងៃមកនេះរវាងរដ្ឋាភិបាលស៊ីវិល និងយោធាដ៏មានអំណាចដែលបានបង្កការព្រួយបារម្ភអំពីការកើតមានរដ្ឋប្រហារមួយក្រោយការបោះឆ្នោតជាតិដែលយោធាចោទប្រកាន់ថាមានការលួចបន្លំ។វាក៏បានកើតឡើងមួយថ្ងៃក្រោយយោធាមីយ៉ាន់ម៉ាបាននិយាយថាខ្លួននឹងការពារព្រមទាំងគោរពរដ្ឋធម្មនុញ្ញរបស់ប្រទេស ហើយអនុវត្តស្របតាមច្បាប់ ។
អ្នកនាំពាក្យគណបក្ស លោកម្យ៉ូ នីអ៊ុន បានប្រាប់សារព័ត៌មានរ៉យទ័រថា លោកស្រីស៊ូជី ប្រធានាធិបតី អ៊ូ វីន មីយីនត៍ រួមជាមួយមេដឹកនាំដទៃទៀតត្រូវបានចាប់ខ្លួនកាលពីដើមថ្ងៃនេះ។«ជាមួយនឹងសភាពការណ៍ដែលយើងកំពុងឃើញនៅពេលឥឡូវ យើងគិតថា យោធាធ្វើរដ្ឋប្រហារ»។អ្នកនាំពាក្យបានបន្ថែមថា « ខ្ញុំចង់ប្រាប់ប្រជាជនរបស់យើងថាកុំប្រញាប់ប្រតិកម្មលឿនពេក និងចង់អោយពួកគេធ្វើតាមច្បាប់»។ការទូរស័ព្ទទៅកាន់រដ្ឋធានីណៃពីដោរ មិនអាចទាក់ទងបានទេនៅព្រឹកនេះខណៈដែលទូរទស្សន៍រដ្ឋបាននិយាយនៅក្នុងការផ្សាយតាមហ្វេសប៊ុកថា ខ្លួនមិនអាចផ្សាយដោយសារបញ្ហាបច្ចេកទេស។ចំណែកអ្នកនាំពាក្យយោធាក៏មិនលើកទូរស័ព្ទដែរ នៅពេលទូរស័ព្ទចូលសុំការបំភ្លឺ។
សូមបញ្ជាក់ថា លោកស្រី ស៊ូជី បានចូលកាន់អំណាចក្នុងការឈ្នះការឆ្នោតនៅឆ្នាំ២០១៥ បន្ទាប់ពីស្ថិតក្នុងការបង្ខាំងអោយនៅក្នុងផ្ទះអស់រាប់ទសវត្សរ៍ នៅក្នុងការតស៊ូដើម្បីលទ្ធិប្រជាធិបតេយ្យមួយដែលបានប្រែក្លាយលោកស្រីទៅជាជនគំរូអន្តរជាតិមួយរូប។សភាថ្មីរបស់មីយ៉ាន់ម៉ាត្រូវចាប់ផ្តើមប្រជុំលើកដំបូងនៅថ្ងៃចន្ទនេះ បន្ទាប់ពីការបោះឆ្នោតកាលពីខែវិច្ឆិកាដែលគណបក្ស សម្ពន្ធជាតិសំរាប់លទ្ធិប្រជាធិបតេយ្យបានឈ្នះភ្លូកទឹកភ្លូកដី ដោយបំបាក់គណបក្សដែលគាំទ្រយោធាយ៉ាងអាម៉ាស់។តែយោធាបានអះអាងថា ការបោះឆ្នោតនេះមានភាពមិនប្រក្រតីនិងទាមទារការស៊ើបអង្កេតតែគណៈកម្មាធិការរៀបចំការបោះឆ្នោតបដិសេធ៕
No comments:
Post a Comment