ភ្នំពេញ៖ក្រោយពេលផ្ទុះការរិះគន់ពីសំណាក់មហាជនរហូតមានការព្រមានពី ក្រុមប្រឹក្សាពិន័យនិងលើកសរសើររបស់ក្រសួងវប្បធម៌ និងវិចិត្រសិល្បៈនឹងចាត់វិធានការចំពោះក្រុមសម្តែងវីដេអូនេះដែលគ្មានវិជ្ជាជីវៈត្រឹមត្រូវធ្វើឲ្យប៉ះពាល់ដល់សីលធម៌សង្គមនិងសាសនានោះ ភ្លាមៗនេះAh Gi Leaders និងប្អូនស្រីបានចេញមុខសុំទោសជាសាធារណៈចំពោះកំហុសឆ្គង។
នៅលើហ្វេសប៊ុករបស់Ah Gi Leadersនិងប្អូនស្រីបានរៀបរាប់ថារឿង ទុំទាវ ២០២១អរគុណសម្រាប់មតិរិះគន់ដើម្បីស្ថាបនាហើយក៏សុំទោសរាល់កំហុសខុសឆ្គងរបស់ក្រុមសម្ដែងពួកខ្ញុំដោយសារតែពួកខ្ញុំមិនបានដឹង អញ្ចឹងវីដេអូនឹងគឺខ្ញុំបានលុបរួចហើយ។ រឿង ទុំទាវ រាល់កំហុសខុសឆ្គងដែលក្រុមនាងខ្ញុំបានសម្ដែងនាងខ្ញុំបានលុបចោលរួចហើយ ចំពោះអ្នកដែលចម្លងយកទៅផុសគឺសុំលុបចោលផងព្រោះសំណុំរឿងនេះបានបញ្ចប់ហើយ ។
បន្ថែមពីនេះAh Gi Leadersនិងប្អូនស្រីបានឲ្យដឹងនៅព្រឹកថ្ងៃនេះដោយទទួលស្គាល់កំហុសឆ្គងក្រុមខ្លួនទៀតថានាងខ្ញុំនិងក្រុមសម្ដែងរឿង ទុំទាវ២០២១បែបកំប្លែងគឺមេត្តាខន្តីអភយ័ទោសសុំទោសក្រសួងវប្បធម៌និងវិចិត្រសិល្បៈ ។ សុំទោសដល់ក្រសួងធម្មការនិងសាសនានិងពុកម៉ែបងប្អូនទាំងអស់គ្នានាងខ្ញុំពិតជាទទួលស្គាល់កំហុសមែន។
ថ្វីត្បិតតែមានការសុំទោសបែបនេះក្ដីបើតាមលោកហេង ឡុង បានបញ្ជាក់ពីចំណាត់ការរបស់ក្រុមប្រឹ ក្សាពិន័យ និងលើកសរសើរ របស់ក្រសួងវប្បធម៌ និងវិចិត្រសិល្បៈនៅព្រឹកថ្ងៃទី០៤ ខែកុម្ភៈ នេះថាក្រុមប្រឹក្សាពិន័យ និងលើកសរសើរ របស់ក្រសួងវប្បធម៌ និងវិចិត្រសិល្បៈ នឹងចាត់វិធានការចំពោះក្រុមសម្តែងវីដេអូនេះដែលគ្មានវិជ្ជាជីវៈត្រឹមត្រូវធ្វើឲ្យប៉ះពាល់ដល់សីលធម៌សង្គមនិងសាសនា។
ជាមួយគ្នានៃការលើកឡើងរបស់លោក ហេង ឡុង ខាងលើនេះក៏កំពុងធ្វើឲ្យមហាជនសម្តែងការគាំទ្រខ្លាំងនិងរង់ចាំមើលចំណាត់ការរបស់ក្រសួងលើក្រុ មសម្តែងនេះផងដែរ។សូមជម្រាបថាក្រុមលក់ឡេអនឡាញ អាជី ថ្មីៗនេះបានធ្វើការចម្លងសាច់រឿង ទុំទាវ មកផលិតនិងសម្តែងឡើងវិញបែបកំប្លែងស្ងួតខណៈនៅក្នុងសាច់រឿងនេះគឺពុំមានតម្លៃអប់រំដល់សង្គមឡើយផ្ទុយទៅវិញបែរជាធ្វើឲ្យប៉ះពាល់ខ្លាំងដល់សីលធម៌សង្គមនិងសាសនា៕
អត្ថបទ ៖ចាន់រ៉ា
No comments:
Post a Comment