ភ្នំពេញ៖កើតចេញពីរឿងស្នេហាត្រីកោណក្រៅឆាកដូចគ្នា តារាសម្ដែងប្រុស យិត មាសឧស្សាហ៍ ហៅអេដវីន និងពិធីការិនី មាន ពេជ្ររីតា ហៅយូប៊ី បានធ្វើឲ្យខ្លួនធ្លាក់ប្រជាប្រិយភាពមួយរំពេចក្នុងនាមជាតារាល្បីឈ្មោះក្នុងរង្វង់សិល្បៈខ្មែរ។ ប៉ុន្តែអ្វីដែលខុសគ្នានៅពេលនេះ គឺតារាសម្ដែងអេដវីន នៅបន្តជាប់ឃុំ រីឯកញ្ញាយូប៊ី ត្រូវតុលាការដោះលែងឲ្យមានសេរីភាព។យើងមិនចង់ប្រៀបធៀបនូវសំណុំរឿង២ផ្សេងគ្នា ទៅនឹងបុគ្គលដែលពាក់ព័ន្ធក្នុងសំណុំរឿងនោះទេ ព្រោះរឿងនីមួយៗមានស្ថានទម្ងន់ទោសខុសគ្នា ហើយចៅក្រមមានឆន្ទានុសិទ្ធិក្នុងការលើកសំអាងហេតុដើម្បីដោះបន្ទុក ឬដាក់បន្ទុកលើបុគ្គលពាក់ព័ន្ធ។ ប៉ុន្តែអ្វីដែលយើងចាប់អារម្មណ៍នោះ គឺតារាទាំង២ដួង ផ្ទុះហិង្សាកើតចេញពីទំនាក់ទំនងស្នេហាដូចគ្នា កើតហេតុក្នុងឆ្នាំ២០២១ ដូចគ្នា ហើយអ្វីដែលចាប់អារម្មណ៍ជាងនេះនោះ គឺអ្នកទាំង២មានវ័យក្មេងពេញស្អាតដូចគ្នា។
រំលឹកពីករណីតារាម៉ូដែល និងជាពិធីការិនីស្ថានីយទូរទស្សន៍My TV មាន ពេជ្ររីតា។ ដំបូងឡើយកញ្ញា ត្រូវបានលោកឧកញ៉ា ហេង សៀ ប្ដឹងពីបទ"លួចមានស្ថានទម្ងន់ទោស" បន្ទាប់ពីកញ្ញាប្រតាយប្រតប់គ្នានៅក្នុងឡានបណ្ដាលលោករងរបួសត្រង់ពោះ និងបាត់ទូរស័ព្ទ ដែលហេតុការណ៍បានកើតនៅម្ដុំផ្លូវកម្ពុជាក្រោម រាជធានីភ្នំពេញ កាលពីដើមខែឧសភា ឆ្នាំ២០២១។ ក្រោយមកតុលាការ សម្រេចចោទប្រកាន់ ហើយបញ្ជាទៅសមត្ថកិច្ចឲ្យឃាត់ខ្លួនកញ្ញាតែម្ដង។មាន ពេជ្ររីតា វ័យ១៩ឆ្នាំ ត្រូវសមត្ថកិច្ច នៃអធិការដ្ឋាននគរបាលខណ្ឌទួលគោក ឃាត់ខ្លួន និងបញ្ជូនទៅតុលាការ ហើយនាងក៏ត្រូវតុលាការសម្រេចឃុំខ្លួនបណ្ដោះអាសន្ន។ ប៉ុន្តែការឃុំខ្លួននេះមិនបានប៉ុន្មានថ្ងៃផង ស្រាប់តែរឿងរ៉ាវបានផ្ទុះកាន់តែធំ ពោលគឺរហូតលេចឮដល់សម្ដេចតេជោ ហ៊ុន សែន ទើបសម្ដេចចាត់ឲ្យក្រុមមេធាវីស្ម័គ្រចិត្តរាជរដ្ឋាភិបាលចូលខ្លួនទៅស៊ើបអង្កេតបន្ថែមលើរឿងនេះ ក្រោយពីនោះតុលាការក៏ចេញដីកាមួយផ្សេងទៀតឲ្យកញ្ញា បាននៅក្រៅឃុំបណ្ដោះអាសន្ន។
ដំណើរការនីតិវិធីនៅតែបន្ដ ហើយមហាជននៅតែបន្ដយកបណ្ដាញសង្គមFacebookរបស់ខ្លួនធ្វើការបកស្រាយ និងបញ្ចេញមតិរៀងៗខ្លួន ដោយអ្នកខ្លះរិះគន់ទៅលើទំនាក់ទំនងរវាងកញ្ញា យូប៊ី និងលោកឧកញ៉ា ហេង សៀ ហើយខ្លះទៀតក៏បង្ហាញការអាណិតអាសូរចំពោះនាងដែរ។ ភាពពុះកញ្ជ្រោលរបស់មហាជនតាមបណ្ដាញសង្គមលើរឿងនេះបានស្ងប់បន្តិច គេក៏ឃើញចៅក្រម នៃសាលាដំបូងរាជធានីភ្នំពេញ ចេញដីកាសម្រេចលើកលែងការចោទប្រកាន់លើកញ្ញាតែម្ដង។ជុំវិញរឿងនេះ ភាគីកញ្ញា មាន ពេជ្ររីតា បានអះអាងតាមរយៈពាក្យបណ្ដឹងរបស់ខ្លួននៅតុលាការថា រូបនាងចាប់ផ្ដើមស្គាល់ និងមានទំនាក់ទំនងជាមួយឧកញ៉ា ហេង សៀ ក្រោយពីលោកឧកញ៉ាផ្ដល់អំណោយមនុស្សធម៌ដើម្បីចែកជូនបន្ដដល់ជនងាយរងគ្រោះតាមរយៈនាង។ ប៉ុន្ដែក្រោយមកទំនាក់ទំនងបានឈានដល់ការមើលងាយ ឬលូកលាន់ពីសំណាក់លោកឧកញ៉ារូបនេះ ហើយនៅថ្ងៃមួយក៏ឈានដល់ការបៀតបៀនកេរខ្មាស ទើបនាងប្រើសិទ្ធដើម្បីការពារខ្លួន។
រីឯភាគីលោកឧកញ៉ា ហេង សៀ វិញ បានអះអាងតាមរយៈពាក្យបណ្ដឹង និងលិខិតសុំទោសមួយច្បាប់ ហើយត្រូវសារព័ត៌មានយកទៅចុះផ្សាយព្រោងព្រាតនោះឲ្យដឹងថា ករណីលោក និងកញ្ញាយូប៊ី មិនមែនជារឿងបៀតបៀន ឬចាប់បង្ខំអ្វីឡើយ ព្រោះទំនាក់ទំនងរបស់លោកបានឈានដល់ការរួមដំណេកជាមួយគ្នាទៀតផង។យើងងាកមកចាប់អារម្មណ៍ករណីតារាសម្ដែងសម្បូរសាច់ដុំ យិត មាសឧស្សាហ៍ ហៅអេដវីន វិញម្ដង។ មិនដល់១ខែផង ក្រោយផ្ទុះរឿងកញ្ញា យូប៊ី ជាមួយឧកញ្ញា ហេង សៀ ស្រាប់តែនៅថ្ងៃទី១៥ ខែមិថុនា បានផ្ទុះរឿងហិង្សាមួយទៀតរវាងលោក អេដវីន ជាមួយសង្សារដែលធ្លាប់តែផ្អែមល្ហែមនឹងគ្នាស្ទើរចាក់ទឹកមិនលេច គឺកញ្ញា សុទ្ធ បញ្ចការ។
ដោយភ្លើងប្រច័ណ្ឌសង្សារជាមួយគ្រូពេទ្យម្នាក់ដែលលោកអះអាងថា លោកបានទៅទាន់សង្សារជាមួយបុរសម្នាក់កំពុងលេងចាក់ទឹកដូង ទើបធ្វើឲ្យលោកទប់កំហឹងលែងបានក៏កើតរឿងឈ្លោះប្រកែកឈានដល់ការប្រើដៃជើង និងខ្សែក្រវាត់វាយទៅលើសង្សារ និងបុរសម្នាក់នោះទៀតផង។ ក្រោយផ្ទុះហិង្សា លោកត្រូវជាប់បណ្ដឹងចំនួន៣នៅតុលាការ គឺបណ្ដឹង២បានប្ដឹងលោកពីបទ"ហិង្សាដោយចេតនា" ពីសំណាក់សង្សារ គឺសុទ្ធ បញ្ចកា និងបុរសម្នាក់ដែលជាគ្រូពេទ្យ។ រីឯបណ្ដឹង១ទៀត គឺជាបណ្ដឹងរបស់អនាគតម្ដាយក្មេកដែលប្ដឹងពីបទ"បំផ្លិចបំផ្លាញទ្រព្យសម្បត្តិអ្នកដទៃ"។ក្រោយមកសមត្ថកិច្ច នៃកងរាជអាវុធហត្ថរាជធានីភ្នំពេញ បានឃាត់ខ្លួនលោករួចកសាងសំណុំរឿងបញ្ជូនទៅតុលាការ។
No comments:
Post a Comment