ពលរដ្ឋរស់នៅក្នុងតំបន់​មួយ​ចំនួន​ ស្ថិត​នៅ​ប៉ែក​ខាងលិច​រាជធានី​ភ្នំពេញ អតីត​ស្ថិត​នៅ​ក្រោម​ការ​គ្រប់គ្រង​របស់​រដ្ឋបាល​ខេត្តកណ្ដាល កំពុងជួបការលំបាក ចំពោះប្រព័ន្ធទឹកស្អាតនិងផ្លូវបេតុង - គេហទំព័រសាន់ដេ ធីវីអនឡាញ
www.sundaytvonline.com /ទំនាក់ទំនងព័ត៌មាន និងផ្សព្វផ្សាយពាណិជ្ជកម្ម Tel: 060842222 / 093843333 /រក្សាសិទ្ធគ្រប់យ៉ាង ដោយអង្គភាពគេហទំព័រសាន់ដេ

Breaking

ពលរដ្ឋរស់នៅក្នុងតំបន់​មួយ​ចំនួន​ ស្ថិត​នៅ​ប៉ែក​ខាងលិច​រាជធានី​ភ្នំពេញ អតីត​ស្ថិត​នៅ​ក្រោម​ការ​គ្រប់គ្រង​របស់​រដ្ឋបាល​ខេត្តកណ្ដាល កំពុងជួបការលំបាក ចំពោះប្រព័ន្ធទឹកស្អាតនិងផ្លូវបេតុង

រាជធានី​ភ្នំពេញ ៖ តំបន់​មួយ​ចំនួន​ស្ថិត​នៅ​ប៉ែក​ខាងលិច​រាជធានី​ភ្នំពេញ ដែល​កាលពី​អតីត​ស្ថិត​នៅ​ក្រោម​ការ​គ្រប់គ្រង​របស់​រដ្ឋបាល​ខេត្តកណ្ដាល ហើយ​រយៈពេល​ប៉ុន្មាន​ឆ្នាំ​ចុង​ក្រោយ​នេះ​ត្រូវ​បាន​រាជរដ្ឋាភិបាល កាត់​បញ្ចូល​ឲ្យ​ស្ថិត​ក្រោម​ការ​គ្រប់គ្រង​របស់​សាលា​រាជធានី​ភ្នំពេញ​នោះ កំពុង​តែ​មានការ​អភិវឌ្ឍ​ទៅ​លើ​វិស័យ​នានា​រួម​មាន វិស័យ​សំណង់ និង​ហេដ្ឋារចនាសម្ព័ន្ធ​។មួយ​ផ្នែក​ធំ​នៃ​តំបន់​ដែល​កាត់​បញ្ចូល​ខាងលើ​នេះ គឺ​ស្ថិត​នៅ​ក្នុង​រដ្ឋបាល​ខណ្ឌ​កំ​បូល និង​មួយ​ផ្នែក​ទៀត​ស្ថិត​នៅ​ក្នុង​រដ្ឋបាល​ខណ្ឌ​ពោធិ៍​សែន​ជ័យ រាជធានី​ភ្នំពេញ ។បច្ចុប្បន្ន​ត្រូវ​បាន​គេ​មើលឃើញ​ថា ការ​អភិវឌ្ឍ​កំពុង​មាន​សន្ទុះ​រីក​ចម្រើន​ឆ្ងាយ​ជាង​ពី​អតីតកាល​។ បើ​និយាយ​ពី​សំណង់​បុរី​ផ្ទះល្វែង​កំពុង​រីក​ដូច​ផ្សិត ដោយឡែក​ភ្លើងអគ្គិសនី​ចូល​ដល់​គ្រប់កន្លែង​ដែល​មាន​មនុស្ស​រស់នៅ ប៉ុន្តែ​ទោះបីជា​ការ​អភិវឌ្ឍ​កំពុង​មាន​សន្ទុះ​លឿន​បែប​នេះ​ក្ដី គឺ​នៅ​មាន​កម្រិត​នៅឡើយ​។

នៅ​ក្នុង​បរិបទ​នេះ ប្រជាពលរដ្ឋ​ដែល​រស់​ភូមិ​សង្កាត់​របស់​ខណ្ឌ​នេះ ថ្វី​ដ្បិតតែ​មានឈ្មោះ​ថា​ជា​អ្នក​ភ្នំពេញ​មែន ប៉ុន្តែ​មួយ​ចំនួន​នៅ​តែ​ជួប​ការ​លំបាក​ខ្វះខាត​លើ​វិស័យ​ហេដ្ឋារចនាសម្ព័ន្ធ​ផ្លូវថ្នល់ លូ​បង្ហូរទឹក ជា​ពិសេស​នៅ​ពុំ​ទាន់​មានទឹក​ស្អាត ឬ​អ្នកស្រុក​តែង​ហៅ​ថា​ទឹក​រដ្ឋ​ប្រើប្រាស់​នៅឡើយ​។ កន្លែង​ខ្លះ​ផ្លូវថ្នល់​នៅ​តែ​ជា​ផ្លូវ​ដី​ផ្លូវលំ​ធម្មតា ឬ​ល្អ​បំផុត​ត្រឹម​ផ្លូវ​ក្រាល​ថ្ម​មិច​ប៉ុណ្ណោះ ពុំ​ទាន់​បាន​ផ្លូវ​ក្រាល​ល​បេតុង​ឬ​កៅស៊ូ​នៅឡើយ ដោយឡែក​ទឹក គឺ​បាន​ទិញ​តាម​រថយន្ត​ដែល​គេ​ដឹក​លក់ ឬ​ទឹក​អណ្ដូង​ដែល​ជីក​តាម​ផ្ទះ​ដាក់ ម៉ូ​ទ័​រ​បូម​យក​មក​ប្រើប្រាស់​ប្រចាំ​ថ្ងៃ គ្មាន​ទឹក​ស្អាត​ដើម្បី​ប្រើប្រាស់​នោះ​ទេ​។

អ្នក​ភូមិ​រំដួល​ខាងត្បូង សង្កាត់​ស្នោរ ខណ្ឌ​កំ​បូល បាន​លើក​ឡើង​ថា ពួក​មានឈ្មោះ​ថា​ជា​អ្នក​រាជធានី​ភ្នំពេញ​នឹង​គេ​ដែរ ព្រោះ​ភូមិ​សង្កាត់​របស់​ពួក​គាត់​ត្រូវ​បាន​កាត់​ចូល​រាជធានី​ភ្នំពេញ​រយៈពេល​ខ្ទង់​១០​ឆ្នាំ​ហើយ​ដែរ ព្រមទាំង​ផ្លាស់​ប្ដូរ​ខណ្ឌ​ចំនួន​៣​រួច​មក​ហើយ​។ ក្នុង​នោះ​ដំណាក់កាល​ទី​១ សង្កាត់​ស្នោរ​ស្ថិត​ក្នុង​ការ​គ្រប់គ្រង​របស់​រដ្ឋបាល​ខណ្ឌដង្កោ លុះ​ដំណាក់កាល​ទី​២ ខណ្ឌដង្កោ​បំបែក​ជា​២ គឺ​បង្កើត​ខណ្ឌ​ពោធិ៍​សែន​ជ័យ​១​ទៀត ក៏​ត្រូវ​ផ្លាស់​ចូល​ក្រោម​ការ​គ្រប់គ្រង​របស់​ខណ្ឌ​នេះ​វិញ ។ បន្ទាប់​មក​ទៀត​ដំណាក់កាល​ទី​៣ ខណ្ឌ​ពោធិ៍​សែន​ជ័យ​ត្រូវ​បាន​បំបែក​ជា​២​ដែរ គឺ​បាន​បង្កើត​ខណ្ឌ​កំ​បូល​១​ទៀត ទើប​សង្កាត់​ស្នោរ ពួក​គាត់​ត្រូវ​ផ្លាស់​ចូល​ក្រោម​ការ​គ្រប់គ្រង​របស់​ខណ្ឌ​កំ​បូល​នេះ​រហូត​ដល់​សព្វថ្ងៃ​។

អ្នក​ភូមិ​ខាងលើ​បាន​ប្រាប់​ឲ្យ​ដឹង​បន្ត​ទៀត​ថា ពួក​គាត់​ចាំ​មិន​ភ្លេច​ទេ កាលពី​ស្ថិត​នៅ​ក្រោម​ការ​គ្រប់គ្រង​របស់​រដ្ឋបាល​ខេត្តកណ្ដាល នៅ​តំបន់​នោះ​ភាគច្រើន ជា​ពិសេស​នៅ​ក្នុងភូមិ​ពួក​គាត់​កុំ​ថា​ឡើយ​ដល់​ទៅ​ផ្លូវ​បេតុង សូ​ម្បី​តែ​ភ្លើងអគ្គិសនី​ក៏​គ្មាន​សម្រាប់​ប្រើប្រាស់​ដែរ កាល​ណោះ​ពួក​គាត់​ប្រើប្រាស់​ភ្លើងចង្កៀង​ប្រេងកាត ហើយ​បើជា​អ្ន​មាន​អាច​មាន​លទ្ធភាព​ទិញ​ម៉ាស៊ីនភ្លើង និង​អា​គុយ ព្រមទាំង​អំ​ពូ​ល​ប្រើ​បាន ។ លុះ​ក្រោយមក​នៅ​អំឡុង​ឆ្នាំ​២០០៥​ទៅ​ឆ្នាំ​២០០៦ ទើប​មាន​ភ្លើងអគ្គិសនី​ក្រុមហ៊ុន​ឯកជន​មួយ​ត​ឲ្យ​ប្រើប្រាស់ តែ​ភ្លើង​ក៏​មាន​តម្លៃ​ខ្ពស់​ដែរ ហើយ​ភ្លើង​វិញ​ខ្សោយ​ពិបាក​ប្រើ​ស្ទើរតែ​អូស​កង្ហារ​ពុំ​រួច​ផង តែ​ទោះ​យ៉ាង​គ្រាន់​បើជា​អត់​។ ក្នុង​កាលៈទេសៈ​នោះ​មិនបាច់​និយាយ​ពី​ទឹក​ស្អាត​ទេ គឺ​គ្មាន​ឡើយ ពួក​គាត់​ប្រើប្រាស់​ទឹកស្រះ និង​ត្រពាំង ព្រមទាំង​អណ្ដូង ព្រោះ​ពេល​នោះ​ទឹក​ត្រពាំង និង​ស្រះ​ស្អាត ពុំ​ទាន់​មានការ​អភិវឌ្ឍ គ្មាន​សំណង់ផ្ទះ​សម្បែង​នៅ​ជិត​ដូច​បច្ចុប្បន្ន ទឹក​មិន​កខ្វក់​ឡើយ ហើយ​បរិភោគ​បាន​ដោយ​គ្មាន​ការ​ខ្ពើមរអើម​នោះ​ទេ​។

ប្រភព​ខាងលើ​បាន​លើក​ឡើង​បន្ត​ទៀត​ថា ដោយឡែក​បច្ចុប្បន្ន ក្រោយ​ពី​ត្រូវ​បាន​រាជរដ្ឋាភិបាល​កាត់​បញ្ចូល​ក្រោម​ការ​គ្រប់គ្រង​របស់​រដ្ឋបាល​រាជធានី​ភ្នំពេញ គឺ​មានការ​អភិវឌ្ឍ​ច្រើន ហើយ​មាន​ភ្លើងអគ្គិសនី​រដ្ឋ​ប្រើប្រាស់​គ្រប់​ភូមិ​ទាំងអស់ និង​មាន​តម្លៃ​ធូរ​ជាងភ្លើង​ឯកជន​ជាង​ពាក់កណ្ដាល​ឯណោះ ហើយ​ការ​អភិវឌ្ឍ​ក៏​មានការ​រីក​ចម្រើន​ជាង​មុន​ឆ្ងាយ​ដែរ​។ ប៉ុន្តែ​ស្រប​ពេល​នេះ​ដែរ ការ​អភិវឌ្ឍ​លើ​វិស័យ​ហេដ្ឋារចនាសម្ព័ន្ធ​ហាក​នៅ​មាន​កម្រិត ដោយនៅ​ក្នុង​ស្រុកភូមិ​ពួក​គាត់ ក៏​ដូច​ជា​ភូមិ​ជា​ច្រើន​ទៀត នៅ​តែ​ពុំ​ទាន់​ទទួល​បាន​ផ្លូវ​បេតុង ឬ​កៅស៊ូ​នៅឡើយ ។

 ចំណែក​វិស័យ​ទឹក​ស្អាត​ក៏​ពុំ​ទាន់​មាន​ដែរ ដែល​ពួក​គាត់​ទន្ទឹងរង់ចាំ​លើ​វិស័យ​ទាំង​២​នេះ​យូរ​មក​ហើយ ម្យ៉ាងទៀត​កាលពីមុន​នៅ​ជិត​ភូមិ​ពួក​គាត់​គ្មាន​ទេ បុរី​ផ្ទះល្វែង គឺ​មាន​តែ​វាលស្រែ​ប៉ុណ្ណោះ តែ​ឥឡូវ​នៅ​ជុំវិញ​ភូមិ​សុទ្ធតែ​បុរី​ផ្ទះល្វែង​អស់ហើយ ដូច្នេះ​ពុំ​អាច​យក​ទឹកស្រះ និង​ត្រពាំង​ប្រើប្រាស់​បាន​ទៀត​ទេ ព្រោះ​ទឹក​កខ្វក់​មិន​ស្អាត​ដូច​មុន​ទៀត​ឡើយ​។ប្រភព​ដដែល​បាន​ឲ្យ​ដឹង​បន្ថែម​ទៀត​ថា សព្វថ្ងៃ​ពួក​គាត់​ប្រើ​ទឹក​អណ្ដូង​ដែល​បាន​ជីក​នៅ​តាម​ផ្ទះ​ដោយ​បាន​ដាក់​ម៉ូ​ទ័​រ​បូម ហើយ​អ្នក​ដែល​គ្មាន​លទ្ធភាព​ជីក​អណ្ដូង គឺ​ពឹងផ្អែក​ទៅ​លើ​ការ​ទិញ​ទឹក​តាម​រថយន្ត​ដែល​គេ​ដឹក​លក់​ក្នុង​១​រថយន្ត​ថ្លៃ​ជាង​៣​ម៉ឺន​រៀល ។ ទោះបីជា​បែប​ណា ពួក​គាត់​បាន​យល់​ថា ទាំងនេះ​គឺ​ដោយសារ​តែ​ប្រទេស​កំពុង​អភិវឌ្ឍ ហើយ​ការ​អភិវឌ្ឍ​នោះ​ទៀត​សោត​គឺ​មា​នកំណ​ត់ និង​ជំ​ហ៊ាន​ៗ​តាម​បែប​ភ្លៀងរលឹម ហើយ​ក៏​សង្ឃឹមថា ក្នុង​ពេល​ដ៏​ខ្លី​ខាង​មុខ ពួក​គាត់នឹង​ទទួល​បាន​ផ្លូវ​បេតុង ព្រមទាំង​ទឹក​ស្អាត​ប្រើប្រាស់​ដូច​ជា​តំបន់​នានា​នៅ​ទូ​ទាំង​រាជធានីភ្នំពេញ។







No comments:

Post a Comment

Pages