ភ្នំពេញ៖ប្រជាពលរដ្ឋ នៅក្រុងប៉ោយប៉ែត ខេត្តបន្ទាយមានជ័យ បានដាក់ពាក្យបណ្តឹង ប្តឹងទៅអង្គភាពប្រឆាំង អំពើពុករលួយ (ACU) ប្តឹងលោក សាន វិជ្ជាសារ៉ាវុធ ប្រធានសាខា ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបន្ទាយមានជ័យ និងមន្ត្រីក្រោមឱវាទ ពីបទប្រព្រឹត្ត អំពើពុករលួយ ជាប្រព័ន្ធ កាលពីថ្ងៃទី២៣ ខែកញ្ញា ឆ្នាំ២០២១។
បើយោងតាមពាក្យបណ្តឹ្ដងរបស់ស្ត្រីឈ្មោះ ហម គឹមវង់ អាយុ៣៨ឆ្នាំ រស់នៅភូមិនិមិត្ត៤ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ បានដាក់ពាក្យបណ្តឹង ប្តឹងទៅលោក ទេសរដ្ឋមន្ត្រី ឱម យ៉ិនទៀង ប្រធានអង្គភាពប្រឆាំង អំពើពុករលួយ បើកការស៊ើបអង្គេត លើប្រធានសាខា កិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) ខេត្តបន្ទាយមានជ័យ និងមន្ត្រីក្រោមឱវាទ ក្នុងករណីបានជំរិតទារលុយ បង់ក្បាលឡាន ជាច្រើនលានរៀល ដោយមិនមានឯកសារ ច្បាស់លាស់ ដែលចាត់ទុកជា ការប្រព្រឹត្ត អំពើពុករលួយ ជាប្រព័ន្ធ ក្នុងការបំពេញការងារ។
ប្រភពដដែល បានឲ្យដឹងថាៈ កំឡុងដើមឆ្នាំ២០២០ ពេលដែលស្ថានភាព ជំងឺកូវីដ១៩ បានឆ្លងចូលមកដល់ ប្រទេសកម្ពុជា អ្នកស្រី បានប្តូរមុខរបរ ពីការលក់ដូរចាប់ហួយ នៅក្នុងផ្ទះ មកស៊ីឈ្នួលដឹកឥវ៉ាន់ ឲ្យអាជីវករ នៅក្នុងខេត្តបន្ទាយមានជ័យ នៅពេលនោះ មន្ត្រីសាខា កិច្ចការពារអ្នកប្រើប្រាស់ កិច្ចការប្រគួតប្រជែង និងបង្ក្រាបការក្លែងបន្លំ ខេត្តបន្ទាយមានជ័យ បានមកគំរាម ទារឲ្យបង់លុយគិត ជាក្បាលឡាន ក្នុងមួយខែ ១៥០.០០០ រៀល (ដប់ប្រាំម៉ឺនរៀល) ដោយគ្មានវិក្កយបត្រ។
មន្ត្រីសាខា កិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ខេត្តបន្ទាយមានជ័យ បានប្រាប់ថា ប្រសិនមិនបង់ ប្រាក់ប្រចាំខែ ពួកគាត់ នឹងចាប់ឡានដឹក ទំនិញរបស់គាត់ បញ្ជូនទៅតុលាការ សាលាដំបូង ខេត្តបន្ទាយមានជ័យ។ ដោយការភ័យខ្លាច និងដើម្បីធានាមុខរបរ ស៊ីឈ្នួលដឹកទំនិញ មួយថ្ងៃ ១ជើង ឬ ពីរជើង អ្នកស្រីបានសម្រេច បង់ប្រាក់ដល់មន្ត្រី ក.ប.ប. ខេត្តបន្ទាយមានជ័យ។
ក្រោយមក នៅកំឡុងខែមេសា ឆ្នាំ២០២១ ឈ្មោះ សាន វិជ្ជាសារ៉ាវុធ ឈ្មោះ ឈួន ពិសី និងឈ្មោះ កែវ ជាមន្ត្រីសាខាកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែង បន្លំ (ក.ប.ប.) បានតម្លើងតំលៃ បង់ក្បាលឡាន ដោយទាមទារបង់លុយ គិតជាក្បាលឡាន មួយជើង តម្លៃ ៨០.០០០ រៀល (ប្រាំបីម៉ឺនរៀល) ពីរជើងតម្លៃ ១៥០.០០០រៀល (ដប់ប្រាំម៉ឺនរៀល) ដោយគ្មានវិក្កយបត្រ។
បន្ទាប់មក នៅកំឡុងខែកក្កដា ឆ្នាំ២០២១ ដោយសារគ្មានលទ្ធភាពបង់ប្រាក់ ក៏បានស្នើសុំបង់ប្រាក់ ៦ ក្បាលឡាន ចំនួន ៣៥០.០០០ រៀល (សាមសិបប្រាំម៉ឺនរៀល) ដោយគ្មានវិក្កយបត្រ។ បែបបទដើម្បីបង់ប្រាក់ឲ្យមន្ត្រី ក.ប.ប. ផ្តើមពីការតម្រូវឲ្យចុះដើរ យកលុយទៅដាក់លើក្បាលឡាន ដែលបញ្ឈរចោល នៅលើដងផ្លូវ។ បោះលុយឲ្យមន្ត្រី ក.ប.ប. ពីលើឡាន ដោយមិនបាច់ឈប់ឡាន ហើយពេលខ្លះ គឺត្រូវដើរយកលុយ ទៅទុកលើតុរបស់មន្ត្រី ក.ប.ប. ដែលដាក់ប៉ុស្តិ៍ល្បាត (កុងត្រូលជជុះ) នៅតាមដងផ្លូវជាតិ ក្រវាត់ព្រំដែនកម្ពុជា-ថៃ។
ប្រភពដដែល បានបន្តថាៈ លុះនៅថ្ងៃទី ១៧ ខែកក្កដា ឆ្នាំ២០២១ វេលាម៉ោង ៨:៣០ នាទីយប់ បើទោះជាអ្នកស្រី បានបង់លុយហើយក៏ដោយ ក៏មន្ត្រី ក.ប.ប. នៅតាមចាប់រថយន្ត របស់អ្នកស្រី ហើយទារការផាកពិន័យ ពីសូន្យរៀល រហូតដល់ ២០ លានរៀល (ម្ភៃលានរៀល)។ គិតចាប់ពីថ្ងៃ ចាប់រថយន្តដឹកទំនិញ ចុងក្រោយ អ្នកស្រី បានបន្តបង់ប្រាក់ ឲ្យមន្ត្រី ក.ប.ប. ចំនួន ៣ ក្បាលឡាន បន្ថែមទៀត។
ក្រោយមក ក៏សម្រេចចិត្តឈប់បង់ប្រាក់ ឲ្យមន្ត្រី ក.ប.ប. ខេត្តបន្ទាយមានជ័យ បន្ទាប់ពីបានមើលព័ត៌មាន ផ្សាយពីសកម្មភាព មិនប្រក្រតីរបស់មន្ត្រី ក.ប.ប. ដើរជំរិតទារប្រាក់ ពីអ្នកដទៃ ដោយព័ត៌មាន បានបញ្ជាក់ថា ការបង់ប្រាក់ ដោយគ្មានវិក្កយបត្រ ជាអំពើខុសច្បាប់ និងជាសកម្មភាពប្រព្រឹត្ត អំពើពុករលួយ។
បន្ទាប់ពីអ្នកស្រី បានបញ្ជាក់ប្រាប់មន្ត្រី ក.ប.ប. ថាៈ ឈប់បង់ប្រាក់ជូនពួកគាត់ ចាប់ពីថ្ងៃទី២៥ ខែកក្កដា ឆ្នាំ២០២១ នៅពេលនោះ មន្ត្រី ក.ប.ប. ឈ្មោះ កែវ បានលុបសារសំឡេងឆ្លងឆ្លើយ បង់លុយកាក់ទាំងស្រុង តាមសារបណ្ដាញ សង្គមហ្វេសប៊ុក (Messenger)។
ដោយកើតទុក្ខមិនសុខចិត្ត អំពីសកម្មភាពជំរិតទារប្រាក់ របស់មន្ត្រី ក.ប.ប. ខេត្តបន្ទាយមានជ័យ អ្នកស្រី សម្រេចចិត្តដាក់ពាក្យប្ដឹង មកអង្គភាពប្រឆាំង អំពើពុករលួយ ដើម្បីស៊ើបអង្គេត និងចាត់ការ តាមនីតិវិធីច្បាប់។
ក្រៅពីអ្នកស្រី ដែលស្ម័គ្រចិត្តប្ដឹងមន្ត្រី ក.ប.ប. មានប្រជាពលរដ្ឋ ដែលរងគ្រោះផ្សេងទៀត បានយល់ព្រម ផ្តល់ភស្តុតាងបន្ថែម ទាក់ទងនឹងអំពើទាមទារ បង់លុយប្រចាំខែ ដោយគ្មានចេញ វិក្កយបត្រនេះ ប្រសិនបើមានការស៊ើបអង្គេត ពីអង្គភាពប្រឆាំង អំពើពុករលួយ។
សកម្មភាពជំរិតទារប្រាក់ ដោយគ្មានវិក្កយបត្រ របស់មន្ត្រីសាខា កិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ប.ប.ក) ខេត្តបន្ទាយមានជ័យនេះ ចាត់ទុកថា ជាទង្វើប្រព្រឹត្ត អំពើពុករលួយ លក្ខណៈប្រព័ន្ធ ដែលអង្គភាពប្រឆាំង អំពើពុករលួយ គួរមានវិធានការ ផ្លូវច្បាប់ បើកការស៊ើបអង្កេត និងចាត់ការ តាមនីតិវិធីច្បាប់ ជាធរមាន មិនគួរលើកលែង។
No comments:
Post a Comment