www.sundaytvonline.com /ទំនាក់ទំនងព័ត៌មាន និងផ្សព្វផ្សាយពាណិជ្ជកម្ម Tel: 060842222 / 093843333 /រក្សាសិទ្ធគ្រប់យ៉ាង ដោយអង្គភាពគេហទំព័រសាន់ដេ


មនុស្ស៤នាក់ ដែលកៀរគរពលរដ្ឋឲ្យប្រឆាំងការអនុវត្តច្បាប់លើរថយន្ដដឹកលើសទម្ងន់ នៅខេត្តបាត់ដំបងត្រូវបាននគរបាលបញ្ចប់ការសួរនាំ ឯ៣នាក់ទៀតត្រូវបញ្ជូនបន្តទៅតុលាការ, ចំណែកមេក្លោងយោធា ឈ្មោះរោង សារឹម កំពុងរត់គេចខ្លួន


(បាត់ដំបង)៖ មនុស្ស៤នាក់ ដែលត្រូវបានឃាត់ខ្លួនពាក់ព័ន្ធករណីកៀរគរប្រជាពលរដ្ឋប្រឆាំងការអនុវត្តច្បាប់របស់សមត្ថកិច្ច លើរថយន្ដថៃដឹកលើសទម្ងន់កំណត់ នៅស្រុកភ្នំព្រឹក ខេត្តបាត់ដំបង បានបញ្ចប់ការសួរនាំ នៅស្នងការដ្ឋាននគរបាលខេត្តបាត់ដំបង និងត្រៀមបញ្ជូនបន្ដទៅកាន់សាលាដំបូងខេត្ត នៅថ្ងៃទី១២ ខែកក្កដា ឆ្នាំ២០២២នេះ។លោក កែវ សុជាតិ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង បាន ឲ្យដឹងថា មនុស្ស៤នាក់នោះ ត្រូវបញ្ចប់ការសួរនាំនៅកន្លែងនគរបាល តែត្រូវបញ្ជូនបន្ដចំនួន៣នាក់ មកសួរនាំនៅតុលាការ។ លោកបន្ដថា ម្នាក់ដែលត្រូវអនុញ្ញាតឲ្យត្រឡប់ទៅផ្ទះវិញនោះ ជាប្រពន្ធរបស់បុរសម្នាក់ជាអ្នកយកបានឲ្យអ្នកតវ៉ា។

បើតាមលោកព្រះរាជអាជ្ញា មនុស្ស៣នាក់ដែលត្រូវបញ្ជូនបន្ដមកកាន់តុលាការនេះ ម្នាក់ជាកូនម្ចាស់សៃឡ, ម្នាក់ជាអ្នកសារព័ត៌មានឡាយបំផុសបំផុលឲ្យប្រជាពលរដ្ឋមកតវ៉ា និងម្នាក់ជាអ្នកយកបាយឲ្យអ្នកតវ៉ា។ដោយឡែក មេក្លោងជាដែលជាមន្ដ្រីយោធាឈ្មោះ រោង សារឹម មានតួនាទីជាមេបញ្ជាការរងតំបន់ប្រតិបត្តិការសឹករងខេត្តបាត់ដំបង តុលាការកំពុងចេញដីកាដើម្បីឲ្យកម្លាំងសមត្ថកិច្ចកំពុងស្រាវជ្រាវចាប់ខ្លួន ចាត់ការបន្ដតាមនីតិវិធី ពាក់ព័ន្ធការប្រព្រឹត្តល្មើសច្បាប់។ នេះបើតាមការឲ្យដឹងពីលោកព្រះរាជអាជ្ញា កែវ សុជាតិ។

សូមជម្រាបថា មនុស្សប្រុស ស្រី ទាំង៤នាក់ ដែលសមត្ថកិច្ចឃាត់ខ្លួន គឺមានមនុស្ស២នាក់ ជាអ្នកយកបាយ ទឹកចែកជូនដល់ក្រុមបាតុកម្ម និងមនុស្សចំនួន ២នាក់ទៀត ត្រូវឃាត់ខ្លួននៅរសៀលថ្ងៃទី១០ ខែកក្កដា ឆ្នាំ២០២២នេះ ករណីឡាយតាមបណ្តាញសង្គម Facebook កៀរគរប្រជាពលរដ្ឋឲ្យនាំគ្នាមកប្រឆាំងឡោមព័ទ្ធ មិនមន្ត្រីជំនាញអនុវត្តច្បាប់យករថយន្តដឹកលើសទម្ងន់មករក្សាទុក។

សូមបញ្ជាក់ថា កាលពីថ្ងៃទី០៩ ខែកក្កដា ឆ្នាំ២០២២ ក្រុមការងារជញ្ជីងចល័តរបស់ក្រសួងសាធារណការ និងដឹកជញ្ជូន ដឹកនាំដោយលោក ឯក រដ្ឋ អនុរដ្ឋលេខាធិការក្រសួងសាធារណការ និងដឹកជញ្ជូន ព្រមទាំងមន្ត្រីមន្ទីរសាធារណការ និងដឹកជញ្ជូនខេត្តបាត់ដំបង ព្រមទាំងកម្លាំងសមត្ថកិច្ចស្រុកភ្នំព្រឹក បានឆ្មក់ចុះថ្លឹងរថយន្តដឹកជញ្ជូននៅលើផ្លូវ៥៩ ស្ថិតក្នុងឃុំអូររំដួល ស្រុកភ្នំព្រឹក ខេត្តបាត់ដំបង ដោយចាប់បានរថយន្តរបស់ឈ្មួញថៃពីរគ្រឿង ដែលកំពុងធ្វើសកម្មភាពដឹកពោតចេញពីកម្ពុជា ឆ្ពោះទៅច្រកអូររំដួលចេញទៅប្រទេសថៃ។

បន្ទាប់ពីការថ្លឹងរថយន្តពីរគ្រឿងនេះ មួយគ្រឿងមានទម្ងន់សរុប ៨២តោន លើសទម្ងន់កំណត់ជាង ៤០តោន និងមួយគ្រឿងទៀត មានទម្ងន់ ៦៤តោន លើសទម្ងន់កំណត់ជាង ២០តោន។ រថយន្តនេះ គឺដឹកលើសទម្ងន់កំណត់ច្រើនជាង ២០ភាគរយ។ ទម្ងន់ដែលបានដឹកលើសនេះ យោងទៅតាមមាត្រា៦០ នៃច្បាប់ស្តីពីផ្លូវថ្នល់ គឺតម្រូវឱ្យរើទំនិញចេញ ហើយឃាត់រថយន្តទុកមួយឆ្នាំ និងពិន័យអន្តរការណ៍ជាប្រាក់ ៣០ម៉ឺនរៀលក្នុងមួយតោន និងដកបណ្ណបើកបរ និងព្យួរទុកចំនួនពីរឆ្នាំ។

Post a Comment

0 Comments