លោកឧត្តមសេនីយ៍ត្រី ហេង វុទ្ធី អញ្ជើញដឹកនាំកងកម្លាំងដោយផ្ទាល់ ចុះអន្តរាគមន៍ក្នុងការជួយសង្រ្គោះ លេីករណីអគ្គិភ័យឆាបឆេះមួយកន្លែង នៅស្រុកកំពង់សៀម

កំពង់ចាម៖នៅរសៀលថ្ងៃទី០៣ ខែមិថុនា ឆ្នាំ២០២៣ វេលាម៉ោង ១៣ និង ៣០នាទី មានករណីអគ្គិភ័យមួយកេីតឡើង ដែលបានឆាបឆេះរោងស្នាក់នៅកម្មករប្រមូលសំរាមមួយកន្លែង របស់ក្រុមហ៊ុនស៊ិនទ្រី ស្ថិតនៅចំណុចភូមិអណ្តូងច្រុះ ឃុំអំពិល ស្រុកកំពង់សៀម ខេត្តកំពង់ចាម ។ ក្រោយទទួលបានព័ត៌មានពីករណីអគ្គិភ័យ ភ្លាមនោះ លោកឧត្តមសេនីយ៍ត្រី ហេង វុទ្ធី ស្នងការនគរបាលខេត្តកំពង់ចាម បានអញ្ជើញដឹកនាំកងកម្លាំងដោយផ្ទាល់ ចុះអន្តរាគមន៍ក្នុងការជួយសង្គ្រោះ លេីករណីអគ្គិភ័យកំពុងឆាបឆេះយ៉ាងសន្ធោសន្ធៅ ដោយមានទាំងកម្លាំងជំនាញខេត្ត កម្លាំងអន្តរាគមន៍ពិសេស កម្លាំងចរាចរណ៍ និងកម្លាំង នៃអធិការដ្ឋាននគរបាលស្រុកកំពង់សៀម និងប្រេីប្រាស់រថយន្ដពន្លត់អគ្គិភ័យ មានចំនួនសរុប ០៥គ្រឿង ប្រើប្រាស់ទឹកក្នុងការពន្លត់អស់ចំនួន ១៩សុីទែន ។

ក្នុងនោះមានរថយន្តពន្លត់អគ្គិភ័យរបស់ការិយាល័យ បង្ការ និងពន្លត់អគ្គិភ័យ ចំនួន០២គ្រឿង រថយន្ដពន្លត់អគ្គិភ័យរបស់អធិការដ្ឋាននគរបាលស្រុកកំពង់សៀម ចំនួន០១គ្រឿង ក្រុងកំពង់ចាម ចំនួន០១គ្រឿង និងស្រុកព្រៃឈរ ចំនួន០១គ្រឿង បានជួយពន្លត់អគ្គិភ័យ រលត់ជាស្ថាពរ ក្នុងរយៈពេល ១ម៉ោង និង៣០នាទី ។ សូមបញ្ជាក់ផងដែរថា អគ្គិភ័យនេះបណ្ដាលឱ្យបាត់បង់ និងខូចខាតសម្ភារៈមួយចំនួន មានដូចជា: រោងស្នាក់នៅមានទំហំទទឹង ១៥x៤៥ម៉ែត្រ ចំនួន០១ខ្នង, ខូចខាតរថយន្ដប្រមូលសំរាម ចំនួន ០៦គ្រឿង ខូចខាតម៉ូតូ ចំនួន ០៦គ្រឿងបាត់បង់ និងសម្ភារៈ ព្រមទាំង ឯកសារមួយចំនួនផ្សេងទៀត តែមិនបណ្ដាលឲ្យឆេះរាលដាលដល់ផ្ទះប្រជាពលរដ្ឋនៅក្បែរនោះឡើយ និងបណ្ដាឲ្យរបួសមនុស្សប្រុស ចំនួន ២នាក់ (កម្រិតមធ្យម) ។

តាមការសិក្សា និងវៃតំលៃពីកម្លាំងជំនាញ អាចសន្និដ្ឋានបានថា ករណីអគ្គិភ័យឆាប់ឆេះគឺបណ្ដាមកពីឆ្លងចរន្តអគ្គីសនី ។បេីទោះបីអគ្គិភ័យនេះ ត្រូវបានរលត់ជាស្ថាពរក៏ដោយ លោកឧត្តមសេនីយ៍ស្នងការ បានដាក់ចេញនូវវិធានការស្រាវជ្រាវបន្ដយ៉ាងយកចិត្តទុកដាក់ខ្ពស់បំផុត និងណែនាំឲ្យកម្លាំងជំនាញ ធ្វេីការផ្សព្វផ្សាយ ណែនាំ អំពីវិធានការ ទប់ស្កាត់ និងបង្ការ ចំពោះអគ្គិភ័យកេីតឡេីង ដោយយថាហេតុ ៕