ភ្នំពេញ៖នាយករង មជ្ឈមណ្ឌលហ្វឹកហ្វឺន ភ្នំជំរាយ បានដកកាំភ្លើង គំរាមយុវជនម្នាក់ ក្រោយពីបានបើករថយន្ត កៀរម៉ូតូរបស់យុវជននោះ ឱ្យដួលបណ្ដាល ឱ្យរងរបួស បាក់ឆ្អឹងដងកាំបិត និងរបួសត្រង់ប្រអប់ជើង។ ហេតុការណ៍នេះ បានបង្កឱ្យ មានការភ្ញាក់ផ្អើល នៅម្ដុំផ្សារធំថ្មី ស្ថិតក្នុងសង្កាត់ផ្សារថ្មីទី១ ខណ្ឌដូនពេញ នៅវេលា ម៉ោង ៤និង៣០ នាទី រំលងអធ្រាត្រ ឈានចូល ថ្ងៃទី១០ ខែមករា ឆ្នាំ២០២១ហើយមកដល់ ពេលនេះ អ្នកបង្កហេតុ នៅមិនទាន់មានទោសទណ្ឌអ្វីឡើយ។
បើតាមការបញ្ជាក់ ពីបុរសម្នាក់ សុំមិនបញ្ចេញឈ្មោះ បានប្រាប់ក្រុមការងារដែលផ្សាយបន្ត ផ្ទាល់ថាៈ មុនដំបូង គាត់បានឃើញរថយន្ត តូយ៉ូតា ព្រូស បើកបរដោយបុរសម្នាក់តាម បណ្តោយផ្លូវ ៧៣ ក្បែរផ្សារធំថ្មី ហើយរថយន្តនោះ បានបើកកៀរម៉ូតូបណ្តាលឲ្យអ្នក បើកម៉ូតូ ជាយុវជនម្នាក់ ដួល និងរងរបួស ហើយបុរស ជាអ្នកបើករថយន្ត បានដកកាំភ្លើង ពីចង្កេះ ដោយស្រែកថា ” ហ្អែងចង់យ៉ាងម៉េច “។ ភ្លាមៗនោះ ជនរងគ្រោះ បានលើកដៃ សុំកុំបាញ់គាត់អី អ្នកដែលឃើញហេតុការណ៍ បានរត់មកជួយ ជនរងគ្រោះ ដែលដួលម៉ូតូ ដោយមានរបួសបាក់ឆ្អឹងដងកាំបិត និងត្រូវត្រង់ប្រអប់ជើងហើយបានជួយបញ្ជូនទៅកាន់ មន្ទីរពេទ្យភ្លាមៗ។
បន្ទាប់មក អ្នកដែលបង្ករ នៅតែបន្តសំញែងកាំភ្លើង នៅមុខសមត្ថកិច្ច ដដែលៗ ទើបសមត្ថកិច្ច សុំដកទុកសិន ហើយជនបង្ករ ក៏បានប្រគល់អោយ តែសំបកកាំភ្លើង មិនប្រគល់គ្រាប់អោយនោះទេ ហើយបានស្រែកគំហក ដាក់សមត្ថកិច្ចថែមទៀតផង ។អ្នកបង្កបានស្រែកប្រាប់ក្រុមការងារដែលផ្សាយបន្តផ្ទាល់ថាៈ ខ្លួនមានមុខងារ ជាមន្ត្រី កងរាជអាវុធហត្ថ និងមានតួនាទី នាយករង មជ្ឈមណ្ឌលហ្វឹកហ្វឺន ភ្នំជំរាយហើយខ្លួន បានចេញ ពីផឹកស៊ីពីកន្លែងមួយ ហើយបំណងបើករថយន្ត ទៅផ្ទះរបស់ខ្លួននៅជិតកន្លែង កើតហេតុនោះ។
ជាចុងក្រោយ ក្រោយជនរងគ្រោះ មិនចង់មានរឿងវែងឆ្ងាយ ក៏មិនបានដាក់ពាក្យបណ្តឹង នៅប៉ុស្តិ៍ប៉ូលិសទេ ដោយសុំត្រឹមតែអ្នកបង្ករ សងថ្លៃព្យាបាល នៅមន្ទីរពេទ្យតែប៉ុណ្ណោះ ដើម្បីបញ្ចប់រឿង ។ ថ្វីដ្បិត ដូចយ៉ាងនេះក្តី សមត្ថកិច្ចមូលដ្ឋាននោះគប្បីតែកសាង សំណុំរឿង បញ្ជូនទៅតុលាការ ដើម្បីសម្រេចសេចក្ដី ផ្ដល់យុតិធម៌ ឱ្យដល់ជនរងគ្រោះ មិនត្រូវឱ្យជនដៃដល់ អាងអំណាចបុណ្យស័ក្តិ រួចផុតពីទោសទ័ណ្ឌ នៅពេលខ្លួនជាមន្ត្រី ដែលទទួលបានការអប់រំ ផ្នែកច្បាប់ ហើយរំលោភលើច្បាប់ដូចនេះឡើយ។
សូមរំលឹកដែរថា ជនដៃដល់ដែលបានបាញ់សម្លាប់ នាយរងការិយាល័យព្រហ្មទណ្ឌកម្រិត ស្រាល នៃស្នងការដ្ឋាននគរបាល រាជធានីភ្នំពេញ ដោយសារតែគ្រោះថ្នាក់ចរាចរណ៍ កាលពីពេលថ្មីៗ កន្លងទៅនេះ នៅមិនទាន់ចាប់ខ្លួនបាននៅឡើយទេ ក៏ប៉ុន្តែក៏មិនត្រូវ ឱ្យមានមន្ត្រីដទៃទៀត បន្តធ្វើសកម្មភាពល្មើសច្បាប់ដែរ។ វប្បធម៌បែបនេះគួរបញ្ឈប់ឲ្យ កើតមាន នៅក្នុងសង្គមជាតិ ៕
No comments:
Post a Comment