www.sundaytvonline.com /ទំនាក់ទំនងព័ត៌មាន និងផ្សព្វផ្សាយពាណិជ្ជកម្ម Tel: 060842222 / 093843333 /រក្សាសិទ្ធគ្រប់យ៉ាង ដោយអង្គភាពគេហទំព័រសាន់ដេ

ប្រជាពលរដ្ឋចំនួន ៣៥គ្រួសារដែលកំពុងធ្វើស្រែប្រាំងលើដីអភិរក្សតំបន់ 0៣ របស់រដ្ឋដែលបានកំណត់ក្នុងអនុក្រិត្យ ១៩៧ ទទួលស្គាល់ថាជាដីរដ្ឋមិនទាមទារកម្មសិទ្ធទេ

បាត់ដំបង៖ឯកឧត្តមដួង តារា  រដ្ឋលេខាធិការ ទីស្តីការគណៈរដ្ឋមន្ត្រី និងជាជំនួយការផ្ទាល់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់នៅលើបណ្តាញសង្គមហ្វេសប៊ុកយ៉ាងដូច្នេះថា។កាលពីថ្ងៃទី១៥ខែ កុម្ភៈ ឆ្នាំ២០២១ មានប្រជាជនចំនួន ៣នាក់តំណាងឲ្យប្រជាពលរដ្ឋចំនួន ៣៥គ្រួសារដែលកំពុងធ្វើស្រែប្រាំងលើផ្ទៃដីជាង៤០០ហិកតា ស្ថិតនៅក្នុងទីតាំងភូមិព្រៃចាស់ ឃុំព្រៃចាស់ ស្រុកឯកភ្នំ ខេត្តបាត់ដំបង និងស្ថិតក្នុងភូមិ កំបៅ ឃុំភ្នំរៀប ស្រុកព្រះនេត្រព្រះ ខេត្តបន្ទាយមានជ័យ បានដាក់ពាក្យគោរពស្នើសុំអន្តរាគមន៍មកសម្តេចតេជោនាយករដ្ឋមន្រ្តី ដើម្បីសុំជួយដោះស្រាយបញ្ហាវិវាទដីធ្លីដែលកន្លងទៅថ្មីៗត្រូវបានអាជ្ញាធរស្រុកឯកភ្នំខេត្តបាត់ដំបងធ្វើការហាមឃាត់។

ប្រជាពលរដ្ឋទាំង ៣៥គ្រួសារបានអះអាងថាពួកគាត់បានទិញដីពីប្រជាពលរដ្ឋដែលរស់នៅទីតាំងខាងលើបានចំនួន ៤៧០ហិកតា កាលពីថ្ងៃទី ១៤ សីហា ២០០៦ ដែលមានចំនួន ៩០ប័ណ្ណដែលមានការបញ្ជាក់ទទួលស្គាល់ដោយអាជ្ញាធរនិងមន្ទីរកសិកម្មខេត្តផងដែរ ហើយប្រជាពលរដ្ឋបានធ្វើស្រែប្រាំងនៅទីនោះជាយូរមកហើយ។ លុះដល់ថ្ងៃទី ២ ខែ កញ្ញា ២០១១ រាជរដ្ឋាភិបាលបានចេញអនុក្រឹតលេខ ១៩៧ កាត់ដីជុំវិញបឹងទន្លេសាបដើម្បីអភិរក្សតំបន់ត្រីពងចំនួន ០៦ខេត្តនៅជុំវិញបឹងទន្លេសាបដែលមានទំហំផ្ទៃដី ៦៤៧,៤០៦ហិកតា ដោយចែកជា០៣ តំបន់ ១ តំបន់២ និងតំបន់៣។ រីឯដីដែលប្រជាពលរដ្ឋបានកាន់កាប់អាស្រ័យផលធ្វើស្រែប្រាំងពេលនេះគឺស្ថិតនៅក្នុងភូមិសាស្រ្តខេត្តបាត់ដំបងផង និងខេត្តបន្ទាយមានជ័យផង។ 

ក្រោយពីទទួលបានអនុក្រិត្យលេខ ១៩៧ នៅក្នុងអំឡុងពេលនោះប្រជាពលរដ្ឋក៏បានផ្អាកអាស្រ័យផលធ្វើស្រែមួយរយៈ (២០១១ -២០១៤) ។ លុះក្រោយមកទៀត ដោយប្រឈមនឹងបញ្ហាជីវភាពរស់នៅ ប្រជាពលរដ្ឋក៏ត្រឡប់មកធ្វើស្រែប្រាំងលើលើទីតាំងដីខាងលើនេះវិញ។ បន្ទាប់មកនៅអំឡុងឆ្នំា ២០១៨ អាជ្ញាធរស្រុកឯកភ្នំខេត្តបាត់ដំបងបានមកធ្វើការហាមឃាត់មិនអោយប្រជាពលរដ្ឋធ្វើស្រែនៅទីតាំងដែលប្រជាពលរដ្ឋកំពុងតែធ្វើស្រែប្រាំងសព្វថ្ងៃ ដោយសារទីតាំងភូមិសាស្រ្តនេះស្ថិតនៅក្នុងតំបន់ ០៣ ដែលបានហាមឃាត់ដោយអនុក្រិត្យ ១៩៧ ។ នៅថ្ងៃទី ២១ ខែកុម្ភៈ ឆ្នាំ ២០២១ ខ្ញុំបានចុះទៅកាន់ទីតាំងខាងលើដើម្បីជួបប្រជាពលរដ្ឋទាំង ៣៥គ្រួសារដោយសហការណ៍ជាមួយ លោកអភិបាលស្រុកឯកភ្នំ ប្រធានមន្ទីរកសិកម្មខេត្ត ប្រធានមន្ទីរជលផល អធិការនគរបាលស្រុកឯកភ្នំ និងកងរាជអាវុធហត្ថស្រុកឯកភ្នំ ដោយបានធ្វើដំណើរតាមរថយន្តផង តាមម៉ូតូផង តាមគោយន្ត និងតាមថ្មើជើងផងទើបបានទៅដល់ទីតាំងដីដែលកំពុងមានវិវាទខាងលើ។

ក្រោយពីបានចុះទៅដល់ទីតាំងខាងលើ និងពិនិត្យជាក់ស្តែងតាមប្រព័ន្ធ GPS គឺបញ្ជាក់ច្បាស់ថា ទីតាំងដីដែលប្រជាពលរដ្ឋ ៣៥គ្រួសារ កំពុងអាស្រ័យផលធ្វើស្រូវប្រាំងពេលនេះពិតជាស្ថិតនៅក្នុងតំបន់ ០៣ ដែលជាតំបន់ហាមឃាត់ដោយអនុក្រិត្យលេខ ១៩៧ ពិតប្រាកដ។ ក៏ប៉ុន្តែជាក់ស្តែង ពេលនេះប្រជាពលរដ្ឋកំពុងតែធ្វើស្រូវប្រាំងដែលកំពុងដុះលូតលាស់ខៀវស្រងាត់ពេញស្រែដែលពួកគាត់កំពុងកាន់កាប់អាស្រ័យផលជាក់ស្តែង។ខ្ញុំបានពន្យល់ណែនាំបងប្អូនប្រជាពលរដ្ឋអោយបានយល់អំពី “ដីរដ្ឋ” ដែលមានអនុក្រិត្យហាមឃាត់ ហើយដែលបាននិរាករណ៍ចោលរាល់នូវឯកសារទិញលក់ទាំងឡាយ រួមទាំងឯកសារដែលពួកគាត់បានទិញកាលពីមុនៗមកផងដែរ។ បងប្អូនប្រជាពលរដ្ឋទាំងអស់បានទទួលស្គាល់នូវកំហុសឆ្គងដែលពួកគាត់បានធ្វើស្រែប្រាំងនៅលើដីដែលរាជរដ្ឋាភិបាលបានហាមឃាត់ពិតប្រាកដមែន។ 

ពេលនេះបងប្អូនប្រជាពលរដ្ឋគ្រាន់តែសុំបង្កបង្កើនផលធ្វើស្រែប្រាំងដើម្បីជីវភាពគ្រួសារ ហើយសន្យាថាមិនលក់ដូរ ឬជួលបញ្ចាំទៅឲ្យអ្នកដទៃទៀតឡើយ ហើយប្រសិនបើរដ្ឋត្រូវការពេលណា ពួកគាត់នឹងប្រគល់ជូនរដ្ឋភ្លាមដោយឥតល័ក្ខខ័ណ្ឌ។ ទន្ទឹមនឹងនេះដែរ បងប្អូនប្រជាពលរដ្ឋសន្យាថាមិនកាប់ទន្ទ្រានឆ្ការពង្រីកទីតាំងដីថែមទៀតជាដាច់ខាត។ ដើម្បីអោយបានដឹងកាន់តែច្បាស់ថាតើបងប្អូនប្រជាពលរដ្ឋ៣៥គ្រួសារកំពុងធ្វើស្រែប្រាំងមានចំនួនប៉ុន្មានហិកតា ហើយចូលក្នុងភូមិសាស្រ្តស្រុកឯកភ្នំខេត្តបាត់ដំបងចំនួនប៉ុន្មានហិកតានោះ គឺអាជ្ញាធរស្រុកឯកភ្នំនឹងរៀបចំវាស់វែងលើទីតាំងជាក់ស្តែងដែលប្រជាពលរដ្ឋកំពុងធ្វើស្រែប្រាំងសព្វថ្ងៃ ដើម្បីកំណត់កុំឲ្យមានការទន្រ្ទានពង្រីកផ្ទៃដីថែមតទៅទៀត ។  

ដើម្បីធានាថាបងប្អូនប្រជាពលរដ្ឋមិនកាប់ទន្រ្ទាន និងយកដីរដ្ឋធ្វើជាសម្បត្តិឯកជន ប្រជាពលរដ្ឋទាំង៣៥គ្រួសារបានធ្វើកិច្ចសន្យាជាបណ្តោះអាសន្នជាមួយអាជ្ញាធរស្រុកឯកភ្នំដែលមានខ្លឹមសារដូចខាងក្រោមៈ។១)ប្រជាពលរដ្ឋ៣៥គ្រួសារព្រមទទួលស្គាល់ថាទីតាំងដីដែលយើងខ្ញុំកំពុងតែអាស្រ័យផលជាដីរបស់រដ្ឋ។២)ក្រៅពីសិទ្ធិអាស្រ័យផល យើងខ្ញុំសូមសន្យាថាមិនទាមទារជាកម្មសិទ្ធិផ្ទាល់ខ្លួននិងចាត់ចែងលើទីតាំងដីដែលកំពុងអាស្រ័យផលឡើយ។៣)នៅពេលដែលរដ្ឋត្រូវការ យើងខ្ញុំសន្យាថានឹងប្រគល់ជូនរដ្ឋដោយមិនទាមទារសំណងឬល័ក្ខខ័ណ្ឌអ្វីឡើយ។៤)យើងខ្ញុំសន្យាថានឹងបញ្ឈប់ការរំលោភបំពាន និងរុករានដីរដ្ឋបន្តទៀត។

៥)យើងខ្ញុំសន្យាថានឹងមិនដាក់គ្រឿងចក្រឈូសឆាយធ្វើផ្លូវឲ្យលើសពីគោលការណ៍ណែនាំរបស់អាជ្ញាធរឡើយ។៦)យើងខ្ញុំសូមស្នើសុំម៉ាស៊ីនបូមទឹកចំនួន០៤គ្រឿង ម៉ាស៊ីនបាញ់ថ្នាំចំនួន០១គ្រឿង និងរួមទាំងទុយោមួយចំនួនដែលអាជ្ញាធរបានរក្សាទុកកន្លងមក។៧)យើងខ្ញុំសន្យាថានឹងចូលរួមអនុវត្តវាស់វែងក្បាលដីរបស់គ្រួសារនីមួយៗដែលបានកាន់កាប់ជាក់ស្តែង ។៨)យើងខ្ញុំសន្យាថាមិនធ្វើការតវ៉ានិងប្តឹងទាមទារទៅស្ថាប័នណាមួយឡើយ។យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង។

























Post a Comment

0 Comments