ឯកឧត្តមដួង តារា៖ យើងទ្រាំលំបាកនៅក្នុងផ្ទះ ប្រសេីរជាងលំបាកនៅហាលក្តៅហាលភ្លៀងប្រឈមនឹងគ្រោះថ្នាក់ធំនៅខាងក្រៅ

ភ្នំពេញ៖ ឯកឧត្តមដួង តារា ជំនួយការផ្ទាល់ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា និងជារដ្ឋលេខាធិការ ទីស្តីការគណៈរដ្ឋមន្រ្តី បានមានប្រសាសន៌ នៅលើបណ្តាញសង្គមហ្វេសប៊ុក យ៉ាងដូច្នេះថា? ខ្ញុំក៏ដូចបងប្អូនដែរគឺបានទិញមី អង្ករ ត្រីខ ត្រីងៀត និងម្ហូបងាយចម្អិនមួយចំនួនទុកប្រើក្នុងពេលដែលទីក្រុងភ្នំពេញត្រូវបានបិទខ្ទប់។ ពេលនេះធ្វើយ៉ាងណាអោយមានបាយទឹកទទួលទាននិងបានរស់នៅជុំក្រុមគ្រួសារ។ បងប្អូនដែលកំពុងប្រឈមនឹងបញ្ហាស្បៀង សូមទាក់ទងអាជ្ញាធរនៅក្នុងកន្លែងបងប្អូនរស់នៅជាបន្ទាន់ដើម្បីទទួលបានការឧបត្ថម្ភស្បៀង។ 

យើងអាណិតសម្តេចតេជោ អាណិតក្រុមគ្រូពេទ្យ អ្នកបេីកឡានពេទ្យ​ អាជ្ញាធរ​ សមត្ថកិច្ចប៉ូលីស​ ប៉េអ៉ិម​...ដែលកំពុងដុតដៃដុតជើងចុះធ្វើការទាំងយប់ទាំងថ្ងៃហាលកម្តៅ​ ហាលភ្លៀងជួយប្រជាពលរដ្ឋដែលពួកគាត់ប្រឈមនឹងហានិភ័យច្រើនជាងយើងនៅផ្ទះ។ ព្រោះពលនេះជំងឺកូវីដ១៩ កំពុងឆ្លងរាតត្បាតសាហាវខ្លាំងណាស់។  

នៅថ្ងៃទី ២៣ មេសា នេះខ្ញុំត្រូវពិនិត្យសំណាកម្តងទៀត ព្រោះត្រូវធ្វើដំណើរទៅប្រទេសឥណ្ឌូនេស៊ីជាមួយ សម្តេចប្រមុខដឹកនាំ នៅថ្ងៃបន្ទាប់។ ពេលវិលត្រឡប់មកវិញ ខ្ញុំក៏ត្រូវធ្វើចត្តាឡីស័កថែមទៀត ដើម្បីធានាថាខ្ញុំមិនយកមេរោគកូវីដ១៩ ពីក្រៅប្រទេសចូលមកចម្លងដល់ក្រុមគ្រួសារ និងបងប្អូនទាំងអស់គ្នា។ 

ក្នុងស្ថានភាពដ៏អាក្រក់នេះ យើងត្រូវតែអត់ធ្មត់ទ្រាំលំបាកទាំងអស់គ្នា។ ដើម្បីសុវត្ថិភាពប្រពន្ធកូននិងក្រុមគ្រួសារ យើងបន្តនៅផ្ទះ  (នៅក្នុងផ្ទះ)កុំចេញក្រៅផ្ទះអោយសោះ !។យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម នឹងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែងដោយគ្មានការរើសអើង៕​