មានឈ្មួញនាំសត្វក្របីឆ្លងដែនទៅប្រទេសវៀតណាមតាមច្រករបៀងផ្គើននឹងបម្រាម

ស្វាយរៀង៖មានករណីឈ្មួញនាំសត្វក្របីរស់ឆ្លងដែនទៅប្រទេសវៀតណាមកាលពីម៉ោងជាង៨ព្រឹកថ្ងៃទី៣០ខែកក្កដានៅចំណុចព្រំដែនច្រករបៀងក្រឡោងខុស ស្ថិតក្នុងភូមិកែវជះ ឃុំបន្ទាយក្រាំង ស្រុកកំពង់រោទិ៍ ជាប់ច្រកព្រំដែនក្រឡោខុស ស្រុកយិនហ៊ឹង ខេត្តឡុងអាន ប្រទេសវៀតណាម។

បើតាមបុរសម្នាក់ដែលជាអ្នកដឹកក្របីតាមរ៉ឺម៉កបានឲ្យដឹងថា ខ្លួនគ្រាន់តែជាអ្នកស៊ីឈ្នួលដឹកសត្វក្របីឲ្យថៅកែក្របី ឈ្មោះ អាន រស់នៅភូមិពោធិក្រូច ឃុំបន្ទាយក្រាំង ឆ្លងដែនទៅប្រទេសវៀតណាម។ ចំពោះតម្លៃក្របី លក់ឲ្យវៀតណាមមួយក្បាលប៉ុន្មានខ្លួនមិនដឹងទេ។ប្រភពបន្តទៀតថា ក្នុងមួយថ្ងៃជាមធ្យមឈ្មួញដឹកក្របីទៅប្រទេសវៀតណាមប្រមាណ១០ទៅ២០ក្បាល ហើយមានក្រុមហ៊ុនចំនួនពីរទីបីក្រុមហ៊ុនផ្សេងទៀត ក៏មាននាំសត្វក្របីរស់រាប់សិបក្បាលឆ្លងដែនទៅប្រទេសវៀតណាមតាមច្ររបៀងក្រឡោងខុសនេះដែរ គឺនាំចេញនៅពេលយប់ក្នុងកំឡុងម៉ោង៧ទៅ៨យប់ ។

ប្រជាពលរដ្ឋក៏បានរាយការណ៍ថា មានអ្នកដឹកសាច់ជ្រូក ពោះគោ ពោះជ្រូក គ្រឿងក្នុងមាន់ទា ត្រីសាច់ចូលពីប្រទេសវៀតណាមតាមម៉ូតូមកតាមច្រករបៀងក្នុងស្រុកកំពង់រោទិ៍ជារៀងរាល់ថ្ងៃ។ទាក់ទិនករណីនមន្ត្រីនគបាលវរៈការពារព្រំដែន ប៉ុស្ត៍ច្រករបៀងក្រឡោងខុស បានប្រាប់អ្នកសារព័ត៌មានថា សត្វក្របីប្រមាណ១០ក្បាលដែលឈ្មោះ អាន ដឹកឆ្លងដែនទៅប្រទេសវៀតណាមនេះគឺ ជាក្របីទិញពីប្រជាពលរដ្ឋក្នុងស្រុកចិញ្ចឹមជាលក្ខណៈគ្រួសារ ហើយលក់ដើម្បីផ្គត់ផ្គង់ជីវភាព។ចំណែកលោក សុច ពិសី អភិបាលស្រុកកំពង់រោទិ៍បាននិយាយថាករណីឈ្មួញលួចនាំសត្វក្របីរស់ចេញទៅ ប្រទេសវៀតណាម ក្នុងភូមិសាស្ត្រឃុំបន្ទាយក្រាំងនេះលោកមិនបានដឹងទេ ហើយបើមានការនាំសត្វក្របីឆ្លងដែនមែននោះគឺពាក់ពន្ធ័សមត្ថកិច្ចដែលឈជើងនៅច្រករបៀងនោះ ។

សូមបញ្ជាក់ថា៖កន្លងមករដ្ឋបាលខេត្តបានចេញសេចក្តីណែនាំឲ្យសមត្ថកិច្ចទប់ស្កាត់ និងរឹតបន្តឹងការធ្វើចរាចរណ៍មនុស្ស និងការនាំសត្វ ចេញចូលតាមច្រករបៀងពីប្រទេសជិតខាង ( សត្វ គោ ក្របី ជ្រូក សាច់សត្វនិងផលិតផលធ្វើពីសាច់សត្វ)។លោកបញ្ជាក់ថា លោកនឹងចាត់មន្ត្រីឲ្យចុះទៅពិនិត្យស្រាវជ្រាវករណីនេះ។ចំណែកបន្លែត្រីសាច់ ដែលប្រជាពលរដ្ឋដឹកបន្តិចបន្តួចគឺគ្រាន់តែសម្រាប់ផ្គត់ផ្គង់ប្រចាំថ្ងៃ នៅក្នុងខេត្ត ដែលដោះដូរទំនិញគ្នាទៅវិញទៅមកដែលរស់នៅតាមតំបន់ព្រំដែនគឺ មានពិតប្រាកដមែន ។លោក យ៉ន សុផល នាយប៉ុស្តិ៍វរៈការពារព្រំដែនសំយ៉ោង បានប្រាប់ក្រុមអ្នកសារព័ត៌មានតាមទូរស័ព្ទថា លោកមិនបានជ្រាបករណីឈ្មួញឈ្មោះអាននាំក្របីឆ្លងដែនទៅប្រទេសវៀតណាមនេះទេដោយមន្ត្រីប្រចាំការនៅច្រករបៀងក្រឡោងខុស មិនទាន់រាយការណ៍ជូនលោក ។ លោកជាប់រវល់ប្រជុំ ។ចាំល្ងាចលោកនឹងសួរទៅមន្ត្រីរបស់លោក៕