ពលរដ្ឋជាក្រុមមាតាបិតាទារករងគ្រោះព្រោះម្សៅទឹកគោនូទ្រីលេត ដាក់ញត្តិជូន រដ្ឋមន្ត្រីក្រសួងយុត្តិធម៌

រាជធានីភ្នំពេញ ៖ ពលរដ្ឋជាក្រុមមាតាបិតា នៃទារករងគ្រោះ ដោយសារម្សៅទឹកគោនូទ្រីលេត នៅថ្ងៃទី២០ សីហា ២០២១នេះ បានមូលមតិគ្នាដាក់ញត្តិជូន ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ ដើម្បីសុំការគាំទ្រ និងវិធានការពន្លឿនលើសំណុំក្ដី ម្សៅទឹកដោះគោវិញ្ចឹមទារកម៉ាកនូទ្រីលេត (Nutrilatt) ដែលនាំចូលចែកចាយដោយក្រុមហ៊ុន S&TK Trading Co. Ltd., បានធ្វើអោយទារកឈឺខ្វះឈាមក្រហម ជាតិដែក និងស័ង្កសី ។សូមបញ្ជាក់ជូនថា គិតមកទល់ពេលនេះ សំណុំរឿងម្សៅទឹកដោះគោ Nutrilatt មានលេខ Batch ចំនួន ៦ប្រភេទ ដែលត្រូវបានរកឃើញថា ខ្វះនូវសារធាតុចិញ្ចឹម និងជាតិដែកដល់ទារក គឺនៅមិនទាន់មានការដោះស្រាយនូវសំណងការខូចខាតដល់ក្រុមមាតាទារកនៅឡើយទេ ។

លោកស្រី ចាន់ ផល្គុណ ដែលជាមាតាទារករងគ្រោះ ក្នុងចំណោមក្រុមមាតាទារក ២១គ្រួសារ បានលើកឡើងថា ក្រុមមាតាបិតានៃទារករងគ្រោះដោយសារម្សៅទឹកដោះគោនូទ្រីលេត បានមូលមតិគ្នាដាក់ញត្តិជូនឯកឧត្តមរដ្ឋមន្ត្រីក្រសួងយុត្តិធម៌ ដើម្បីសុំការគាំទ្រ និងវិធានការពន្លឿនលើសំណុំក្ដីរឿងម្សៅទឹកដោះគោនូទ្រីលេត ។ ត្បិតតែនេះជាបណ្ដឹងថ្នាក់ក្រសួងពាណិជ្ជកម្ម យើងខ្ញុំទាំងអស់គ្នាបានគិតគូយ៉ាងល្អិតល្អន់ ក្នុងការជម្រុញរឿងក្ដីនេះ អោយបានដោះស្រាយឆាប់ៗ ដើម្បីជាបទពិសោធន៍មួយ នៃការធ្វេសប្រហែលបណ្ដាលអោយមានផលិតផល ដែលបង្កហានិភ័យដល់អ្នកប្រើប្រាស់ ជាពិសេសលើអាយុជីវិតទារក ។ ហើយយើងខ្ញុំ ក៏ជឿជាក់ថា ខាងតុលាការនឹងផ្ដល់អាទិភាពលើរឿងក្ដីនេះ ។

ជាមួយគ្នានេះដែរក៏មានស្ត្រីជាមាតាទារករងគ្រោះផ្សេងទៀត ក៏បានអោយដឹងដែរថា ថ្ងៃនេះ ខែនេះ ឆ្នាំនេះ (ទី១៤ កក្កដា ២០២០/ទី១៤ កក្កដា ២០២១) គឺជាថ្ងៃគម្រប់ខួប១ឆ្នាំ នៃការដាក់ពាក្យបណ្តឹងស្វែងរកការស្រាយបំភ្លឺ និងទាមទាររកយុត្តិធម៌ ជូនកូនជាទីស្រលាញ់ ក៏ដូចជាទារកដទៃ ដែលបានរងគ្រោះ ដោយសារម្សៅទឹកដោះគោ ដែលមានតែឈ្មោះ និងតារាដ៏ល្បីផ្សព្វផ្សាយស្គុសស្គាយ ដូចផ្ការុះរោយចាកទងតាមដងវិថី ប៉ុន្តែគ្មានគុណភាព សមប្រកបទៅតាមតម្លៃ និងការអួតផ្សាយ ។

រយៈពេល១ឆ្នាំកន្លងមកនេះ ឪពុកម្តាយទារករងគ្រោះ ទ្រាំអត់ធ្មត់ខាំមាត់សង្កត់ចិត្ត ទប់ទឹកភ្នែក រក្សារភាពឈឺចាប់ ដោយផ្លូវចិត្តនៅតែមានវិប្បដិសារី ប្រៀបដូចជាយកថ្នាំពុលឲ្យកូនផឹក បន្ទាប់ពីប្រើម្សៅទឹកដោះគោខុស ។សូមជម្រាបថា ចំនួនមាតាបិតាទារករងគ្រោះ ដែលបានមកដាក់បណ្ដឹងកើនឡើងដល់ ២១គ្រួសារហើយ ប៉ុន្តែដំណោះស្រាយគ្នា តាមផ្លូវរដ្ឋប្បវេណី បើគ្មានលទ្ធផលទេនោះ នឹងបន្តទៅតាមផ្លូវតុលាការ ។ទោះជាយ៉ាងណា ខាងលើនេះជាការលើកឡើងរបស់ភាគីមាតាបិតាទារករងគ្រោះប៉ុណ្ណោះ កោះសន្តិភាពរង់ចាំទទួលការបំភ្លឺពីភាគីខាងក្រុមហ៊ុន S&TK Trading Co. Ltd., ជានិច្ច ។

គួរបញ្ជាក់ដែរថា ម្សៅទឹកដោះគោ Nutrilatt មាន Batch ចំនួន ៦ប្រភេទ រួមមានលេខ B/N 487, 488, 536, 537, 538, 539 បន្ទាប់ពីបានធ្វើការវិភាគដោយមន្ទីរពិសោធន៍ឯករាជ្យ និងមានការទទួលស្គាល់ជាអន្តរជាតិ (Independent and Internationally Accredited Laboratory) ឈ្មោះ Eurofins Food Testing Singapore PTE LTD. នៅប្រទេសសិង្ហបុរី ។ ការវិភាគបង្ហាញថា ជាតិដែក (Iron) ដែលមាននៅក្នុងម្សៅទឹកដោះគោទាំងនេះមានកម្រិតទាបជាងការប្រកាសរបស់ក្រុមហ៊ុន និងស្តង់ដាកូដិចអន្តរជាតិ (Codex International Standard) ។ ក្រោយរកឃើញថា ខ្វះនៅសារធាតុចិញ្ចឹមដល់ទារកទាំងនោះត្រូវបានក្រសួងពាណិជ្ជកម្មប្រកាសឲ្យប្រមូលទីផ្សារមកវិញ និងឲ្យក្រុមហ៊ុនផ្អាកការនាំចូលម្សៅទឹកដោះគោខាងលើរហូតដល់មានការជូនដំណឹងជាថ្មី ៕