កោះកុង៖បន្ទាប់ពីធ្វើអនុប្បយោគផ្ទៃដីទំហំ៨ ៦៣១ហិកតា ស្ថិតនៅក្នុងឧទ្យានជាតិបូទុមសាគរ ភូមិសាស្ត្រឃុំតានួន ស្រុកបូទុមសាគរ ខេត្តកោះកុង ទៅជាទ្រព្យសម្បត្តិឯកជនរបស់រដ្ឋរួចមក និងយោងតាមស្មារតីលិខិតលេខ១០៥៤សណ.បស្ថ ចុះថ្ងៃទី០៥ ខែសីហា ឆ្នាំ២០២១របស់ក្រសួងបរិស្ថានដែលមានឯកឧត្តម សាយ សំអាល់ ជារដ្ឋមន្ត្រីនោះ រាជរដ្ឋាភិបាលកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខ បានសម្រេចប្រគល់ផ្ទៃដីទំហំជិត៩ពាន់ហិកតានេះជូនក្រុមហ៊ុន Royal Group Co.,Ltd. មានអ្នកឧកញ៉ា គិត ម៉េង ជាអគ្គនាយក ដើម្បីរៀបចំបង្កើត និងអភិវឌ្ឍន៍តំបន់សេដ្ឋកិច្ចពិសេស ដោយអនុក្រឹត្យលេខ១៨៣អនក្រ.បក ចុះថ្ងៃទី១៥ ខែកញ្ញា ឆ្នាំ២០២១ ។
ការទទួលបានផ្ទៃដីឧទ្យានជាតិបូទុមសាគរ ទំហំជិត៩ពាន់ហិកតា ដើម្បីរៀបចំបង្កើត និងអភិវឌ្ឍន៍តំបន់សេដ្ឋកិច្ចពិសេសនៅខេត្តកោះកុងរបស់ក្រុមហ៊ុន Royal Group Co.,Ltd. នេះ គឺប្រៀបដូចជា «កាដូបន្ថែម» របស់រាជរដ្ឋាភិបាលកម្ពុជាជូនឧកញ៉ា គិត ម៉េង ដែលគេស្គាល់ថាជាប្រធានសភាពាណិជ្ជកម្មកម្ពុជា និងជាអ្នកជំនួញដ៏ល្បីឈ្មោះនៅកម្ពុជាបន្ទាប់ពីទទួលបានគោរមងារថ្មីជា «អ្នកឧកញ៉ា» ដោយព្រះរាជក្រឹត្យលេខនស/រកត/០២២១/១៨៣ ចុះថ្ងៃទី២៣ ខែកុម្ភៈ ឆ្នាំ២០២១ ។
គួររំលឹកជូនដែរថា កាលពីឆ្នាំ២០២០កន្លងទៅ រាជរដ្ឋាភិបាលកម្ពុជាក៏ធ្លាប់បានសម្រេចធ្វើអនុបយោគជាទ្រព្យសម្បត្តិឯកជនរបស់រដ្ឋនូវផ្ទៃដីទំហំ១៦៨,៨០ហិកតា ដែលជាតំបន់ប្រើប្រាស់ដោយចីរភាព (ទ្រព្យសម្បត្តិសាធារណៈរបស់រដ្ឋ) ក្នុងឧទ្យានជាតិបូទុមសាគរ ស្ថិតនៅភូមិថ្មស និងភូមិចម្លងគោ ឃុំថ្មស ស្រុកបូទុមសាគរ ខេត្តកោះកុង និងជួលទៅឲ្យក្រុមហ៊ុន Royal Group Co.,Ltd. របស់ឧកញ៉ា គិត ម៉េង សម្រាប់បម្រើការក្នុងគម្រោងអភិវឌ្ឍន៍រោងចក្រអគ្គិសនីដុតធ្យូងថ្ម មានកម្លាំងអានុភាព៧០០មេហ្គាវ៉ាត់ ដោយអនុក្រឹត្យលេខ១២២អនក្រ.បក ចុះថ្ងៃទី០៦ ខែសីហា ឆ្នាំ២០២០ ៕
No comments:
Post a Comment